மழைநீரை சேமிக்க 41 குளங்கள் புனரமைப்பு: புதிய குளங்களில் ‘சமூக சோலை’ உருவாக்க திட்டம்

சென்னை மாநகராட்சி பகுதியில் தேங்கும் மழைநீரைச் சேமிக்கும் முயற்சியாக 41 குளங்கள் புனரமைக்கப்பட்டு வருகின்றன. புதிதாக வேளச்சேரியில் அமைக்கப்பட்ட குளத்தில் ‘சமூக சோலை’ உருவாக்க திட்டமிடப்பட்டுள்ளதாக துணை ஆணையா் (பணிகள்) வி.சிவகிருஷ்ணமூா்த்தி தெரிவித்தாா்.

இது குறித்து அவா் செய்தியாளா்களிடம் கூறியதாவது:

சென்னை மாநகராட்சி பகுதிகளில் 3,050 கி.மீ. நீளத்துக்கு மழைநீா் வடிகால் அமைக்கப்பட்டுள்ளது. இந்த மழைநீா் வடிகால் மற்றும் விருகம்பாக்கம், ஓட்டேரி நல்லா உள்ளிட்ட 35 பெரிய கால்வாய்களில் வரும் தண்ணீரை கொசஸ்தலையாறு, கூவம், அடையாறு ஆறுகளில் இணைந்து கடலில் கலக்கிறது. இந்த மழைநீரை சேமிக்க மாநகராட்சி சாா்பில் கூடுதல் கவனம் செலுத்தப்படவுள்ளது.

இதன் முதல்கட்டமாக மாநகராட்சியின் கட்டுப்பாட்டில் உள்ள 41 குளங்கள் ரூ.37.11 கோடி மதிப்பில் புனரமைத்து தூா்வாரப்பட்டு வருகின்றன. இந்தக் குளங்கள் ஏற்கெனவே தண்ணீா் தேங்கிய பகுதியாக காணப்பட்டன. பின்னா், கழிவுகள் கொட்டப்பட்டு, புதா் மடிந்து காணப்பட்டதால், மழைநீா்த் தேங்க முடியாமல் குடியிருப்புப் பகுதிக்கு செல்லும் நிலை ஏற்பட்டது. வளசரவாக்கம் பகுதியில் சுமாா் 3 கி.மீ. சுற்றளவில் வக்ஃப் போா்டு குளம், ஆவின் குளம், எஸ்விஎஸ் நகா் குளம் என 3 குளங்கள் புனரமைக்கப்பட்டுள்ளன. இதனால் வளசரவாக்கத்தில் தேங்கும் மழைநீா் இந்தக் குளத்தில் சேமித்து வைக்க முடியும். இதுபோன்று மழைநீா்த் தேங்கும் பகுதியைக் கண்டறிந்து அங்கு காலியாக உள்ள இடங்களில் புதிய குளங்கள் அமைக்க நடவடிக்கை எடுக்கப்படும்.

புதிய குளங்கள்: சமீபத்தில் கிண்டி ரேஸ்கோா்ஸ் மைதான வளாகத்தில் புதிதாக 4 குளங்கள் அமைக்கப்பட்டு வருகின்றன. இதன் பயன்பாட்டை பொருத்து கூடுதலாக ஒரு குளம் அமைக்க திட்டமிடப்பட்டுள்ளது.

அதேபோல், வேளச்சேரி ரயில் நிலையம் அருகே இரு குளங்கள் அமைக்கப்பட்டுள்ளன. இதனால் அந்தப் பகுதியில் தேங்கும் மழைநீா் 2 முதல் 4 மடங்கு சேமிக்க முடியும். இந்தக் குளத்தைச் சுற்றி ரூ.15 கோடி மதிப்பில் ‘சமூக சோலை’ (கம்மியூனிட்டி காா்டன்) எனும் திட்டத்தின் கீழ் நடைப்பாதை, மின்விளக்கு அமைத்து பொதுமக்கள் பயன்படுத்தும் இடமாக மாற்றப்படும்.

விருகம்பாக்கம் கால்வாய்: நீா்வளத் துறையின் பராமரிப்பில் இருந்த விருகம்பாக்கம் கால்வாய் சமீபத்தில் சென்னை மாநகராட்சியிடம் பராமரிப்புப் பணிகள் மேற்கொள்ள ஒப்படைக்கப்பட்டது. மழைக் காலங்களில் கால்வாயில் இருந்து மழைநீா் வெளியேறுவதைத் தவிா்க்கும் வகையில் 28 பாலங்கள் அருகே தூா்வாரும் பணி மேற்கொள்ளப்பட்டு வருகிறது. இந்தக் கால்வாயை மேம்படுத்தும் நடவடிக்கை சென்னை ஐஐடி உடன் இணைந்து மேற்கொள்ளப்பட்டு வருகிறது. மேலும், கால்வாயில் கூடுதல் நீா் செல்லும் வகையில் 12 சிறிய பாலங்களை இடித்து அகற்றிவிட்டு, கூடுதல் உயரத்துடன் கட்ட திட்டமிடப்பட்டுள்ளது என்றாா் அவா்.