தேனி: குடிநீர் வடிகால் வாரியத்தில் ரூ.1.18 கோடி மோசடி; கையாடல் பணத்தில் புது வீடு; நடந்தது என்ன?

திண்டுக்கல் மாவட்டம் சிலுக்குவார்பட்டியைச் சேர்ந்தவர் முருகானந்தம் (56). இவர் தேனி என்.ஆர்.டி. நகரில் உள்ள தமிழ்நாடு குடிநீர் வடிகால் வாரிய கழிவுநீர் பராமரிப்புப் பிரிவு அலுவலக கண்காணிப்பாளராகப் பணியாற்றி வந்தார். இந்நிலையில் இவர் மீது மோசடி புகார் எழுந்ததைத் தொடர்ந்து, துறை சார்ந்த உயர் அதிகாரிகள் ஆய்வு நடத்தினர்.

அதில் சென்னையைச் சேர்ந்த தனியார் கட்டுமான நிறுவனத்திற்கு 42.29 லட்ச ரூபாய்க்கான அலுவலக வங்கி காசோலை அனுப்பியுள்ளார். அலுவலக வங்கிக் கணக்கிலிருந்து அவரின் சொந்த வங்கிக் கணக்கிற்குப் பல்வேறு தேதிகளில் 75.77 லட்ச ரூபாயை மாற்றியுள்ளார் என்பது தெரியவந்தது. இதுகுறித்து நிர்வாகப் பொறியாளர் கருத்தப்பாண்டியன் அளித்த புகாரில் முருகானந்தம் மீது தேனி மாவட்ட குற்றப்பிரிவு போலிஸார் வழக்குப்பதிவு செய்து விசாரித்து வந்தனர்.

இதற்கிடையே கண்காணிப்பாளர் முருகானந்தம், தேனி குற்றவியல் நடுவர் நீதிமன்றத்தில் சரணடைந்தார். இதையடுத்து போலீஸார் முருகானந்தத்தை 4 நாள்கள் காவலில் எடுத்த விசாரித்ததில் மோசடி நடைபெற்றது குறித்து ஒப்புதல் வாக்குமூலம் அளித்துள்ளார்.

இதுகுறித்து நம்மிடம் பேசிய போலீஸார், திண்டுக்கல் ஐ.டி.ஐ.யில் படித்த முருகானந்தம், கோவையில் உள்ள லட்சுமி மில், திருச்சி பெல் நிறுவனத்தில் பயிற்சி முடித்துள்ளார். பின் தேனி ஒருங்கிணைந்த குழந்தை வளர்ச்சித் திட்ட அங்கன்வாடி அமைப்பாளராகப் பணிபுரியும் சித்ராவைத் திருமணம் முடித்தார். இந்த தம்பதிக்கு 2 மகன்கள் உள்ளனர்.

கடந்த 2019-ல் பெரியார் குடிநீர் வடிகால் வாரிய அலுவலகத்தில் தட்டச்சராகப் பணியில் சேர்ந்து பதவி உயர்வில் கண்காணிப்பாளராக இருந்து வந்துள்ளார். கடந்த 2 ஆண்டுகளுக்கு முன் மோசடி புகாரில் இடைநீக்கம் செய்யப்பட்டுள்ளார். மோசடி செய்ததை ஒப்புக்கொண்டு அந்த பணத்தை ஒரே நாளில் வடிகால் வாரியத்திற்குத் திருப்பி செலுத்தியுள்ளார்.

அதன்பின் பணியில் சேர்ந்த இவருக்குக் காசோலையில் கையெழுத்திடும் அதிகாரம் வழங்கப்பட்டிருக்கிறது. அதைப் பயன்படுத்தி நிதி ஆவணங்களில் முறைகேடு செய்து பல கட்டங்களாக 1.18 கோடி ரூபாய் மோசடி செய்திருக்கிறார். மோசடி செய்த பணத்தின் மூலம் ஆண்டிபட்டி அருகே புதிய வீடு ஒன்றைக் கட்டி வருகிறார். சுற்றுலாவும் சென்றிருக்கிறார்" என்றனர்.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/SeenuRamasamyKavithaigal