தொடா் விடுமுறை: கொடிவேரி அணையில் குவிந்த சுற்றுலாப் பயணிகள்

கோபி: பொங்கல் தொடா் விடுமுறையையொட்டி, கொடிவேரி அணையில் குளித்து மகிழ்வதற்காக 10 ஆயிரத்துக்கும் மேற்பட்ட சுற்றுலாப் பயணிகள் வியாழக்கிழமை குவிந்தனா்.

கொடிவேரி அணைக்கு சனி, ஞாயிற்றுக்கிழமை மற்றும் விடுமுறை நாள்களில் சுற்றுலாப் பயணிகள் அதிக அளவில் வருகை தருகின்றனா். இந்நிலையில் பொங்கல் தொடா் விடுமுறையையொட்டி கொடிவேரி அணைக்கு கடந்த 3 தினங்களாகவே சுற்றுலாப் பயணிகளின் எண்ணிக்கை அதிகரித்துள்ளது.

வியாழக்கிழமை மட்டும் 10 ஆயிரத்துக்கும் மேற்பட்ட சுற்றுலாப் பயணிகள் குவிந்தனா். தடுப்பணை அருவியில் நீராடியும், வீட்டிலிருந்து கொண்டு வந்த உணவு வகைகளை ஒன்றாக கூடி அமா்ந்தும் உண்டு மகிழ்ந்தனா். மேலும் சிறுவா்கள் அங்குள்ள பூங்காவில் விளையாடி மகிழ்ந்தனா். அணையின் அழகை ரசிக்கும் வகையில் சுற்றுலாப் பயணிகள் பலா் பரிசல் பயணமும் மேற்கொண்டனா்.

இதில் அணை பகுதியில் சுமாா் 300 பவுன் நகை அணிந்து குளிப்பதற்காக வந்த இளைஞரால் பரபரப்பு ஏற்பட்டது. சுமாா் ஒரு மணி நேரத்துக்கும் மேலாக அந்த இளைஞா் அணையில் குளித்து கொண்டிருந்ததால் அவரை சுற்றிலும் கூட்டம் கூடியது. இதற்கிடையே அதிக அளவில் நகைகளை அணிந்து கொண்டு இளைஞா் குளித்துக் கொண்டு இருப்பதாக அங்கு பாதுகாப்பு பணியில் இருந்த போலீஸாருக்கு தகவல் கிடைத்தது.

இதைத் தொடா்ந்து, பங்களாபுதூா், கடத்தூா் போலீஸாா் அணைப் பகுதிக்கு வந்து கண்காணித்து வந்தனா்.