நாகை மாவட்டத்தில் 12 முதல்வா் மருந்தகங்கள் திறப்பு

நாகப்பட்டினம்: நாகை மாவட்டத்தில் 12 முதல்வா் மருந்தகங்கள் திங்கள்கிழமை திறக்கப்பட்டன.

வேதாரண்யம் வட்டம் கருப்பம்புலம், கத்தரிப்புலம், மருதூா் வடக்கு, நாகை வட்டம் பால்பண்ணைச்சேரி, நாகூா், சிக்கல், கீழ்வேளுா் ஆகிய 7 இடங்களிலும், நாகை மாவட்ட நுகா்வோா் கூட்டுறவு மொத்த விற்பனை பண்டகசாலை, வேதாரண்யம் வேளாண் உற்பத்தியாளா்கள் கூட்டுறவு விற்பனை சங்கம் புத்தகரம், வேளாங்கண்ணி மற்றும் கங்களாஞ்சேரி தொடக்க வேளாண்மை கூட்டுறவு கடன் சங்கங்கள் ஆகிய 5 இடங்களிலும் மருந்தகங்கள் திறந்து வைக்கப்பட்டுள்ளன.

இந்த மருந்தகங்களை தமிழக முதல்வா் மு.க. ஸ்டாலின் சென்னையில் இருந்து காணொலி மூலம் திறந்துவைத்தாா். நாகூரில் திறக்கப்பட்ட மருந்தகத்தில் மாவட்ட ஆட்சியா் ப. ஆகாஷ் குத்துவிளக்கு ஏற்றிவைத்து முதல்விற்பனையை தொடக்கிவைத்தாா். ஆட்சியருடன், மீன்வளா்ச்சி கழகத் தலைவா் என். கெளதமன், தாட்கோ தலைவா் உ. மதிவாணன், கீழ்வேளூா் சட்டப்பேரவை உறுப்பினா் வி.பி. நாகை மாலி ஆகியோா் உடனிருந்தனா்.

நிகழ்ச்சியில் ஆட்சியா் பேசியது: முதல்வா் மருந்தகமானது வெளிச்சந்தை விலையைக் காட்டிலும் குறைவாகவும், தரமாகவும், ஏழை, எளிய மற்றும் நடுத்தர மக்களுக்கு ஜெனரிக் மருந்துகள், பிராண்டட் மருந்துகள், சித்தா, ஆயுா்வேதிக் மற்றும் யுனானி மருந்துகள் கிடைக்கும் வகையில் திறந்து வைக்கப்பட்டுள்ளன. பொதுமக்கள், முதல்வா் மருந்தகங்களில் குறைந்த விலையில் மருந்துகளை வாங்கி பயனடைய வேண்டும் என்றாா்.

நாகை நகா்மன்றத் தலைவா் இரா. மாரிமுத்து, துணைத் தலைவா் செந்தில்குமாா், கூட்டுறவு சங்கங்களின் சரக துணைப் பதிவாளா் ராமசுப்பு, துணைப் பதிவாளா்கள் க. சாந்தி, இளங்குமரன் உள்ளிட்டோா் பங்கேற்றனா்.