நெல்லையில் தனியாா் கூரியா் நிறுவனத்தில் தீ விபத்து

திருநெல்வேலி சந்திப்பில் தனியாா் கூரியா் நிறுவனத்தில் ஞாயிற்றுக்கிழமை தீ விபத்து ஏற்பட்டது. திருநெல்வேலி சந்திப்பில் உள்ள தனியாா் கூரியா் நிறுவனத்தில் ஞாயிற்றுக்கிழமை காலையில் திடீரென தீ விபத்து ஏற்பட்டது.

தகவல் அறிந்ததும் பாளையங்கோட்டை தீயணைப்பு நிலைய வீரா்கள் சம்பவ இடத்திற்கு சென்று தீ மேலும் பரவாமல் தடுத்து அணைத்தனா்.

மின்கசிவு காரணமாக தீ விபத்து ஏற்பட்டதாகவும், ஆணவங்கள் உள்ளிட்ட உடமைகள் சேதமடையும் முன்பு தீ கட்டுக்குள் கொண்டு வரப்பட்டதாகவும் தீயணைப்பு நிலைய வீரா்கள் தெரிவித்தனா்.

இதேபோல திருநெல்வேலி சந்திப்பு ரயில்வே திருமண மண்டபத்தில் ஞாயிற்றுக்கிழமை சுப நிகழ்ச்சிக்காக வைக்கப்பட்டிருந்த எரிவாயு சிலிண்டரில் கசிவு ஏற்பட்டு தீ விபத்து உருவாகும் அபாயம் ஏற்பட்டது.

தகவலறிந்ததும் பேட்டை தீயணைப்பு நிலைய வீரா்கள் சம்பவ இடத்திற்கு வந்து எரிவாயு சிலிண்டரை மண்டபத்தில் இருந்து வெளியே கொண்டு சென்று எரிவாயுவை முற்றிலும் வெளியேற்றி விபத்து ஏற்படாமல் தடுத்தனா். இதனால் திருமண மண்டபத்தில் சுமாா் ஒரு மணி நேரம் பரபரப்பு நிலவியது.