கடலூா் மாவட்டம், காட்டுமன்னாா்கோவில் அருகே தந்தை-மகன் இடையே ஏற்பட்ட தகராறை விலக்கச் சென்ற சிறுவன் தீக்காயம் அடைந்தாா். இதுதொடா்பாக கூலித் தொழிலாளியை புத்தூா் போலீஸாா் சனிக்கிழமை கைது செய்தனா்.
காட்டுமன்னாா்கோவில் அடுத்துள்ள கலியமலை கிராமத்தைச் சோ்ந்தவா் ராஜவேல் (48), கூலித் தொழிலாளி. இவா், வெள்ளிக்கிழமை இரவு தனது வீட்டில் படுத்திருந்தாராம். அப்போது, அவரது மகன் ஹரிஹரன் (16), அதே பகுதியைச் சோ்ந்த சக்திவேல் மகன் ஸ்டாலின்(15) ஆகியோா் கைப்பேசியில் சப்தத்துடன் விளையாடிக் கொண்டிருந்தனராம்.
இதை ராஜவேல் கண்டித்தாா். இதனால், ராஜவேலுக்கும், அவரது மகன் ஹரிஹரனுக்கும் இடையே வாய்த்தகராறு ஏற்பட்டது. இந்நிலையில், ராஜவேல் பைக்கில் இருந்த பெட்ரோலை எடுத்து வந்து மகன் ஹரிஹரன் மீது ஊற்றியுள்ளாா். அப்போது, அருகில் இருந்த ஸ்டாலின் மீதும் பெட்ரோல் கொட்டியது.
உடனடியாக ராஜவேல் தீக்குச்சியை உரசி மகன் ஹரிஹரன் மீது வீச முயன்றாராம். ஆனால், அந்த குச்சி ஸ்டாலின் மீது பட்டு தீபற்றியது. அங்கிருந்தவா்கள் தீயை அணைத்து சிறுவனை மீட்டு காட்டுமன்னாா்கோவில் அரசு மருத்துவமனைக்கு அழைத்துச் சென்றனா்.
அங்கு மருத்துவா்கள் முதலுதவி சிகிச்சை அளித்து தீவிர சிகிச்சைக்காக சிதம்பரம் ராஜா முத்தையா மருத்துவக் கல்லூரி மருத்துவமனைக்கு அனுப்பி வைத்தனா்.
அங்கு அவருக்கு மருத்துவா்கள் சிகிச்சை அளித்து வருகின்றனா். இதுகுறித்து ஸ்டாலின் புத்தூா் காவல் நிலையத்தில் புகாா் அளித்தாா். அதன்பேரில் போலீஸாா் வழக்குப் பதிவு செய்து ராஜவேலை சனிக்கிழமை கைது செய்து சிறையில் அடைத்தனா்.
