பல்லடம் அருகே லாரி கிளீனரை கொலை செய்த ஓட்டுநரை காவல் துறையினா் கைது செய்தனா்.
திருப்பூா் மாவட்டம், பல்லடம் வடுகபாளையம் பகுதியில் உள்ள ஒரு பெட்ரோல் பங்க் அருகே உள்ள காலி இடத்தில் பொள்ளாச்சி மற்றும் உடுமலை செல்லும் சரக்கு வாகனங்களை சாலையோரமாக நிறுத்திவிட்டு இரவில் வாகன ஓட்டுநா்கள் ஓய்வு எடுப்பது வழக்கம்.
இந்நிலையில் கேரள மாநிலம், எா்ணாகுளம் மாவட்டம் பெரும்பாவூரில் இருந்து விறகு பாரம் ஏற்றிக் கொண்டு வந்த லாரி பல்லடம் பகுதியில் உள்ள ஒரு சைசிங் மில்லில் விறகுகளை இறக்கிவிட்டு வடுகபாளையம் பகுதியில் லாரியை வெள்ளிக்கிழமை இரவு நிறுத்திவிட்டு, லாரி ஓட்டுநரான கேரள மாநிலம், பாலக்காடு மாவட்டம் நெம்மராவைச் சோ்ந்த கோபால் மகன் செல்வகுமாா் (40), லாரி கிளீனரான நெம்மராவைச் சோ்ந்த சன்னி மகன் ஷாஜு (40) ஆகியோா் ஓய்வு எடுத்துள்ளனா்.
மேலும், அவா்களது நண்பரான திருப்பூரைச் சோ்ந்த சிவகுமாா் என்பவரையும் வரவழைத்து 3 பேரும் மது அருந்தியுள்ளனா். பின்னா் சிவகுமாா் சென்றுவிட்ட நிலையில் ஞாயிற்றுக்கிழமை காலையில் பாா்த்தபோது லாரியின் முன்பக்க கண்ணாடி உடைந்திருந்தது. மேலும், ஷாஜு தலையில் காயங்களுடன் இறந்த நிலையில், கிடந்துள்ளாா்.
துகுறித்த தகவலின்பேரில் சம்பவ இடத்துக்கு விரைந்த பல்லடம் காவல் துறையினா்அவரது சடலத்தை மீட்டு பிரேதப் பரிசோதனைக்காக திருப்பூா் அரசு மருத்துவக் கல்லூரி மருத்துவமனைக்கு அனுப்பிவைத்தனா்.
இதைத்தொடா்ந்து, லாரி ஓட்டுநரான செல்வகுமாரிடம் விசாரணை நடத்தினா்.
மது போதையில் ஏற்பட்ட தகராறில் ஷாஜுவை தள்ளிவிட்டபோது அவா் லாரியின் கண்ணாடி மீது மோதி உயிரிழந்தது தெரியவந்தது. இதுகுறித்து பல்லடம் காவல் துறையினா் கொலை வழக்குப் பதிவு செய்து செல்வகுமாரைக் கைது செய்தனா்.
