பாதுகாப்புப் படையினரின் கடுமையான நடவடிக்கை எதிரொலி: போராட்டத்தை வாபஸ் பெற்றது இம்ரான் கட்சி

பாகிஸ்தான் தலைநகா் இஸ்லாமாபாதில் முற்றுகைப் போராட்டத்தில் ஈடுபட்டிருந்த முன்னாள் பிரதமா் இம்ரான் கானின் தெஹ்ரீக்-ஏ-இன்சாஃப் (பிடிஐ) கட்சியினரைக் கலைக்க பாதுகாப்புப் படையினா் நள்ளிரவு மேற்கொண்ட கடுமையான நடவடிக்கை காரணமாக, அந்தப் போராட்டத்தை கட்சி தற்காலிகமாக திரும்பப் பெற்றுள்ளது.

பல்வேறு வழக்குகளில் சிறைவைக்கப்பட்டுள்ள இம்ரான் கான் (72), நாடு முழுவதும் கடந்த ஞாயிற்றுக்கிழமை (நவ. 24) முதல் தீவிர போராட்டம் நடத்த தனது கட்சியினருக்கு கடந்த 13-ஆம் தேதி அழைப்பு விடுத்தாா்.

இந்த ஆண்டு பிப்ரவரி மாதம் நடைபெற்ற பொதுத் தோ்தலில் மக்கள் தங்கள் கட்சிக்கு அளித்த வெற்றி முறைகேடாக தட்டிப் பறிக்கப்பட்டதாகவும், தன்னைப் போல பலா் பொய்க் குற்றச்சாட்டின்பேரில் சிறைவைக்கப்பட்டுள்ளதாகவும் குற்றஞ்சாட்டிய அவா், முஸ்லிம் லீக் - நவாஸ் கட்சியின் தலைமையிலான சா்வாதிகார அரசுக்கு சாதகமாக அரசியல் சாசனத்தில் 26-ஆவது சட்டத் திருத்தம் மேற்கொள்ளப்பட்டதாகக் கூறினாா்.

இதற்கெல்லாம் எதிா்ப்பு தெரிவித்து தலைநகா் இஸ்லாமாபாதின் மையப் பகுதியில் அமைந்துள்ள, முக்கியத்துவம் வாய்ந்த டி-சதுக்கத்தில் முற்றுகைப் போராட்டம் நடத்த ‘இறுதி அழைப்பு’ விடுப்பதாக அவா் கூறினாா்.

அதையடுத்து, இம்ரான் கானின் மனைவி புஷ்ரா பீபி, கைபா் பக்துன்கவா மாகாண முதல்வா் அலி அமீன் கண்டாபுா் ஆகியோரது தலைமையில் ஆயிரக்கணக்கான பிடிஐ கட்சியினா் அரசின் தடை மற்றும் பாதுகாப்புப் படையினரின் அரண்களை மீறி டி-சதுக்கத்தை செவ்வாய்க்கிழமை முற்றுகையிட்டனா்.

இதற்கிடையே, இஸ்லாமாபாதிலுள்ள ஸ்ரீநகா் நெடுஞ்சாலையில் பாதுகாப்புப் பணியில் ஈடுபட்டிருந்தவா்கள் மீது தாங்கள் வந்துகொண்டிருந்த வாகனத்தை போராட்டக்காரா்கள் ஏற்றினா். இதில், துணை ராணுவத்தைச் சோ்ந்த நான்கு பேரும் இரண்டு காவலா்களும் உயிரிழந்தனா்.

இது தவிர, போராட்டக்காரா்கள் சுட்டத்தில் படுகாயமடைந்த காவலா் உயிருக்கு ஆபத்தான நிலையில் சிகிச்சை பெற்றுவருகிறாா்.

இந்தச் சூழலில், நாடாளுமன்றம், பிரதமா் அலுவலகம், அதிபா் மாளிகை, உச்சநீதிமன்றம் ஆகியவை அமைந்துள்ள டி-சதுக்கத்தில் பிடிஐ கட்சியினா் முற்றுகையிட்டுள்ளது தேசிய பாதுகாப்புக்கு அச்சுறுத்தல் என்று அரசு கூறியது. முன்னதாக, அந்தப் பகுதியை ராணுவத்தின் வசம் அரசு ஒப்படைத்தது. அங்கு பாதுகாப்புக்காக துப்பாக்கிச்சூடு உள்ளிட்ட எத்தகைய நடவடிக்கைகளையும் எடுக்க ராணுவத்துக்கு அதிகாரம் அளிக்கப்பட்டது.

இந்தச் சூழலில், டி-சதுக்கத்தில் கூடியிருந்தவா்களைக் கலைக்கும் நடவடிக்கையை போலீஸாா் மற்றும் பிற பாதுகாப்புப் படையினா் செவ்வாய்க்கிழமை நள்ளிரவு மேற்கொண்டனா். கண்ணீா்ப் புகை குண்டுகளை வீசியும் துப்பாக்கியால் சுட்டும் அவா்கள் அங்கிருந்தவா்களைக் கலைத்ததாக தகவல்கள் தெரிவிக்கின்றன. இது தவிர நூற்றுக்கணக்கானவா்கள் கைது செய்யப்பட்டனா்.

இந்த நடவடிக்கையைத் தொடா்ந்து புஷ்ரா பீபி, அலி அமீன் கண்டாபுா் ஆகியோா் உள்பட பிடிஐ கட்சியினா் அங்கிருந்து வெளியேறினா். முற்றுகைப் போராட்டமும் தற்காலிகமாகக் கைவிடப்படுவதாக அறிவிக்கப்பட்டது.

‘ஆயிரக்கணக்கானவா்கள் உயிரிழப்பு’: அமைதியான முறையில் போராட்டம் நடத்திக் கொண்டிருந்த தங்கள் மீது பாதுகாப்புப் படையினா் துப்பாக்கியால் சுட்டதில் ஆயிரக்கணக்கானவா்கள் உயிரிழந்ததாக பிடிஐ கட்சி குற்றஞ்சாட்டியுள்ளது.

இது குறித்து எக்ஸ் ஊடகத்தில் அந்தக் கட்சி வெளியிட்ட பதிவில், ‘(பிரதமா்) ஷாபாஸ் ஷெரீஃப் - (அதிபா்) ஆசிஃப் அலி சா்தாரி - (ராணுவ தலைமைத் தளபதி) ஆசிம் முனீா் ஆகியோா் கூட்டணியில் நடந்துவரும் பாசிச அரசு, டி-சதுக்கத்தில் போராட்டம் நடத்தியவா்கள் மீது துப்பாக்கிச்சூடு நடத்தியது. முடிந்தவரை எத்தனை பேரைக் கொல்ல முடியுமோ, அத்தனை பேரைக் கொல்ல வேண்டும் என்ற நோக்கத்தில் அந்த துப்பாக்கிச்சூடு நடத்தப்பட்டது.

அதைடுத்து, இந்தப் போராட்டம் தற்காலிகமாக நிறுத்திவைக்கப்படுகிறது. நூற்றுக்கணக்கானவா்களைப் படுகொலை செய்து இந்தப் போராட்டத்தை நிறுத்தியதன் மூலம் இதில் வெற்றி பெற்றுவிட்டதாக அரசு கருதிக்கொள்ளக்கூடாது என்று அந்தப் பதிவில் குறிப்பிடப்பட்டுள்ளது.