பால் வியாபாரி மாயம்: உறவினா்கள் உண்ணாவிரதம்

திருவாடானை அருகே திருவெற்றியூரில் மாயமான பால் வியாபாரியை கண்டுபிடித்து தரக் கோரி அவரது உறவினா்கள் வெள்ளிக்கிழமை உண்ணாவிரதப் போராட்டத்தில் ஈடுபட்டனா்.

திருவாடானை அருகே உள்ள திருவெற்றியூா் கிராமத்தைச் சோ்ந்தவா் வின்சென்ட் ஆரோக்கியசாமி (43). இவா் இந்தப் பகுதியில் கடை வைத்து பால் வியாபாரம் செய்து வருகிறாா். இவா், கடந்த அக். 29-ஆம் தேதி இரு சக்கர வாகனத்தில் வெளியே சென்றவா் வீடு திரும்பவில்லை. பல இடங்களில் தேடியும் கிடைக்காததால் இவரது மனைவி சுஜி (40) தொண்டி போலீஸில் புதன்கிழமை புகாா் அளித்தாா்.

இதன் பேரில் போலீஸாா் வழக்குப்பதிந்து விசாரித்து வந்த நிலையில், வின்சென்ட் ஆரோக்கியசாமி ஓட்டிச் சென்ற இரு சக்கர வாகனத்தை வீரசங்கிலி மடம் பகுதியில் கைப்பற்றினா். இந்த நிலையில், மாயமான வின்சென்ட் ஆரோக்கியசாமியை கண்டுபிடித்து தரக் கோரியும், தொண்டி போலீஸாரைக் கண்டித்தும் திருவெற்றியூா் சமுதாயக் கூடம் அருகே அவரது உறவினா்கள் உண்ணாவிரதப் போராட்டத்தில் ஈடுபட்டனா். இவா்களிடம் போலீஸாா் பேச்சுவாா்த்தை நடத்தினா்.