புதிய ரயில் பாதைத் திட்டம்: மத்திய அமைச்சருக்கு எம்.பி. கண்டனம்

மதுரை-அருப்புக்கோட்டை-தூத்துக்குடி புதிய ரயில் பாதைத் திட்டம் தொடா்பாக மத்திய ரயில்வே அமைச்சா் உண்மைக்குப் புறம்பாக பேசுவது கண்டனத்துக்குரியது என மக்களவை உறுப்பினா் சு. வெங்கடேசன் தெரிவித்தாா்.

இதுதொடா்பாக அவா் வெளியிட்ட அறிக்கை: மத்திய ரயில்வே அமைச்சா் அஸ்வினி வைஷ்ணவ் சென்னையில் செய்தியாளா்களுக்கு அளித்த பேட்டியில், மதுரை- அருப்புக்கோட்டை-தூத்துக்குடி புதிய ரயில் பாதைத் திட்டத்துக்கு மாநில அரசு எதிா்ப்பு தெரிவித்ததால், அது கைவிடப்பட்டதாக தெரிவித்திருந்தாா்.

கடந்த இடைக்கால நிதிநிலை அறிக்கையில் ரூ.100 கோடியும், வழக்கமான நிதிநிலை அறிக்கையில் ரூ.18 கோடியும் ஒதுக்கி இருப்பதை நான் ஏற்கெனவே சுட்டிக்காட்டி விமா்சித்துள்ளேன். அதற்கு முழு நிதி ஒதுக்க வேண்டும் என்று கோரியிருந்தேன்.

இப்போது அந்தத் திட்டமே கைவிடப்பட்டது என்று அவா் அறிவித்தது அதிா்ச்சியை அளித்தது. அதுவும் தமிழக அரசு கேட்டுக் கொண்டதற்கு இணங்க அது கைவிடப்பட்டதாக அவா் அறிவித்தாா். இந்த நிலையில், தமிழக அமைச்சா் இந்தத் திட்டத்தை கைவிட தாங்கள் கூறவில்லை என்றும், ரயில்வே அமைச்சா் கூறுவது பொய் எனவும், கூடுதலாக நிதி ஒதுக்க வேண்டும் என்று தான் கோரியிருந்தோம் எனவும் விளக்கி இருந்தாா்.

இப்போது ரயில்வே அமைச்சா், தமிழக அரசு கைவிடக் கோரியது தனுஷ்கோடி திட்டத்தை தான் என்றும், செய்தியாளா்கள் எழுப்பிய சப்தத்தால் சரியாக புரிந்து கொள்ளாமல் தனுஷ்கோடி திட்டம் தான் கேட்கிறாா்கள் என்று நினைத்து தமிழக அரசு கைவிடக் கூறியதாகக் கூறிவிட்டதாகவும் உண்மையில் தூத்துக்குடி திட்டம் கைவிடப்படவில்லை எனவும், அதற்கு நிலம் கையகப்படுத்தும் பிரச்னை இல்லை எனவும் இப்போது விளக்கமளித்துள்ளாா்.

அவா் கூறியது அனைத்து ஊடகங்களிலும் ஒரே மாதிரியாக வந்துள்ள போது, சப்தத்தால் குழப்பம் ஏற்பட்டதாக அமைச்சா் சொல்வது ஏற்கக் கூடியதாக இல்லை. செய்தியாளா் சந்திப்பின் காணொலியும் மிகத் தெளிவாகவே உள்ளது. அமைச்சா் வேண்டுமென்றே தமிழக அரசின் மீது பழிபோடவே அவ்வாறு கூறினாா் என்றே எண்ணத் தோன்றுகிறது. உண்மை அப்படி இருக்கும் பட்சத்தில் ஊடகங்களில் வந்த செய்தியை உடனடியாக ஏன் மறுக்கவில்லை என்ற கேள்வி எழுகிறது.

எல்லா விமா்சனங்களுக்குப் பிறகு ஐந்து நாள்களுக்குப் பின்னா் இப்போது தான் ரயில்வே நிா்வாகம் பதில் அளித்துள்ளது. இப்படித்தான் மக்களவையில் எந்தக் கேள்வி கேட்டாலும் அதற்கு திசை திருப்பும் பதில் அளிக்கிறாா்கள்.

புதிய பாம்பன் பாலத்தின் கட்டுமானம் 30 சதவீதம் பலமற்று இருக்கிறது என ரயில்வே பாதுகாப்பு அமைப்பு குற்றஞ்சாட்டிய போது வாய் திறக்காத தமிழக பாஜக தலைவா் அண்ணாமலை, அமைச்சரின் பொய்யான தகவலை நம்பி வேகவேகமாக போராட்டத்தை அறிவித்துள்ளாா். அவரைத் தொடா்ந்து அதிமுகவும் போராட்டத்தை அறிவித்தது.

உண்மையில் மத்திய அரசு, ரயில்வே துறையில் தமிழ்நாட்டை தொடா்ந்து எப்படி புறக்கணிக்கிறது என்பதை பற்றி அடிப்படை புரிதல் இருக்கும் யாரும் அமைச்சரின் பேச்சு எவ்வளவு அபத்தம் என்பதை ஆராயாமலே புரிந்து கொள்ள முடியும்.

ரயில்வே அமைச்சகமும், ரயில்வே அமைச்சரும் மக்கள் மத்தியில் உண்மையைப் பேச இனியாவது முன் வர வேண்டும். அந்த அளவு முயற்சிப்பது கடினம் என்றால் குறைந்த பட்சம் மதுரை- தூத்துக்குடி புதிய ரயில் பாதைத் திட்டத்துக்கான நிதியையாவது வரும் நிதிநிலை அறிக்கையில் போதுமான அளவு ஒதுக்கி நியாயம் வழங்க முயற்சிக்க வேண்டும் என்றாா் அவா்.