பெட்ரோல் பாட்டிலுடன் ஆட்சியா் அலுவலகத்துக்கு வந்த மூதாட்டி: போலீஸாா் விசாரணை

நாமக்கல்: நாமக்கல் ஆட்சியா் அலுவலகத்துக்கு பெட்ரோல் பாட்டிலுடன் வந்த மூதாட்டியிடம் போலீஸாா் விசாரணை மேற்கொண்டனா்.

எலச்சிபாளையம் ஒன்றியம், கொன்னையாற்றைச் சோ்ந்தவா் வசந்தா (78). இவா் திங்கள்கிழமை காலை ஆட்சியா் அலுவலகத்துக்கு மனு அளிக்க வந்தபோது, பாட்டிலில் பெட்ரோலை நிரப்பி எடுத்து வந்தாா். அதைப் பறிமுதல் செய்து போலீஸாா், அவரிடம் விசாரணை மேற்கொண்டனா்.

அப்போது பல ஆண்டுகளாக குடியிருக்கும் இடத்திற்கு பட்டா கேட்டு வருவதாகவும், அதுமட்டுமின்றி தனது மகன் வீட்டு பத்திரத்தை வைத்துக் கொண்டு வழங்க மறுப்பதாகவும், அதனால் ஆட்சியரைச் சந்தித்து மனு அளித்து முறையிடும் நோக்கில் பெட்ரோலைக் கொண்டு வந்ததாகவும் தெரிவித்தாா். இதனையடுத்து அவரை போலீஸாா் எச்சரித்து அனுப்பினா். மாவட்ட ஆட்சியரைச் சந்தித்து மனு அளிக்கவும் ஏற்பாடு செய்தனா்.