மகா கும்பமேளாவுக்குச் செல்ல வேண்டுமா? குஜராத் அரசின் சுற்றுலாத் தொகுப்பு!

உத்தரப் பிரதேசத்தில் உள்ள பிரயாக்ராஜில் நடைபெறும் மகா கும்பமேளாவைப் பார்வையிடத் திட்டமிடும் மக்களுக்கு குஜராத் அரசு சிறப்பு சுற்றுலாத் தொகுப்பை அறிவித்துள்ளது.

ஜனவரி 13ஆம் தேதி தொடங்கிய மகா கும்பமேளா பிப்ரவரி 26 வரை நடைபெறுகிறது. கடந்த 11 நாள்களில் 10 கோடி பேர் திரிவேணி சங்கமத்தில் நீராடி மகிழ்ந்துள்ளனர். இந்த நிலையில் மகா கும்பமேளாவுக்குச் செல்ல சிறப்பு சுற்றுலாத் தொகுப்பை அறிவித்துள்ளது குஜராத் அரசு..

இதுதொடர்பாக உள்துறை மற்றும் போக்குவரத்துத் துணை இணை அமைச்சர் ஹர்ஷ் சங்கவி கூறுகையில்,

இந்த சுற்றுலாத் தொகுப்பின் கீழ், அகமதாபாத்தில் உள்ள ராணிப் பேருந்து பணிமனையிலிருந்து தினமும் காலை 7 மணிக்கு பிரயாக்ராஜுக்கு ஏசி வால்வோ பேருந்து புறப்படும்.

ஜனவரி 27-ஆம் தேதி காலை ராணிப் பணிமனையிலிருந்து குஜராத் முதல்வர் பூபேந்திர படேல் முதல் பேருந்தை கொடியசைத்துத் துவக்கிய பிறகு இந்த சேவை தொடங்கும்.

இந்து சனாதன தர்மத்தில் மகா கும்பமேளா சிறப்பு முக்கியத்துவம் வாய்ந்தது.

இந்த மாபெரும் நிகழ்வைப் பார்வையிட விரும்பும் குஜராத்தைச் சேர்ந்த பக்தர்களுக்கு இடையூறு இல்லாத பயணத்தை உறுதி செய்வதற்காக, குஜராத்திலிருந்து பிரயாக்ராஜுக்கு ஒவ்வொரு நாளும் ஏசி வால்வோ பேருந்துகளை இயக்க மாநில அரசு இந்த முயற்சியை எடுத்துள்ளது.

அகமதாபாத் மற்றும் பிரயாக்ராஜ் இடையேயான தூரம் கிட்டத்தட்ட 1,200 கி.மீ. என்பதால், மத்தியப் பிரதேசத்தில் உள்ள சிவபுரியில் ஒரு இரவு பேருந்து நிறுத்தப்படும் என்றும், சிவபுரியில் தங்குவதும் இந்தத் தொகுதியில் சேர்க்கப்பட்டுள்ளது.

குஜராத் பக்தர்களுக்காக ஒரு நபருக்கு ரூ. 8,100-க்கு மூன்று இரவுகள் மற்றும் 4 பகல்கள் கொண்ட தொகுப்பு தயாரிக்கப்பட்டுள்ளது. இது குஜராத் மாநில சாலைப் போக்குவரத்துக் கழகம் மற்றும் சுற்றுலாக் கழகத்தின் கூட்டு முயற்சியாகும்.

இந்தத் தொகுப்பில் பயணம் மற்றும் தங்குதல் ஆகியவை அடங்கும். மேலும் மூன்று இரவுகளுக்கான தங்குமிடம் மற்றும் பேருந்து பயணம் ஆகியவை அடங்கும், மேலும் பிரயாக்ராஜில் ஒரு இரவு தங்குவதற்கு குஜராத் பெவிலியன் தங்குமிடத்தில் ஏற்பாடு செய்யப்பட்டுள்ளது என்று அவர் கூறினார்.

இந்த பிரயாக்ராஜ் தொகுப்பை ஆன்லைன் முன்பதிவு ஜனவரி 25 முதல் மாநிலப் போக்குவரத்துக் கழகத்தின் வலைத்தளமான www.gsrtc.in மூலம் பதிவு செய்யலாம்.

புனித மகா கும்பமேளாவைக் குஜராத் மாநில மக்கள் பயன்படுத்திக் கொள்ளும் வகையில் அரசு இந்த முயற்சியை மேற்கொண்டுள்ளது. பிரயாக்ராஜுக்கு தினமும் ஏராளமான பக்தர்கள் வருகை தருவதால், சூழ்நிலைக்கு ஏற்ப நேரமும் வசதிகளும் மாறக்கூடும் என்று அவர் கூறினார்.