உ.பி: மருத்துவமனையில் இரவில் தீ விபத்து; 10 குழந்தைகள் தீயில் கருகி பரிதாபமாக உய...
ரஞ்சி கோப்பை கிரிக்கெட்டில், ரயில்வேஸுக்கு எதிரான ஆட்டத்தில் தமிழ்நாடு அணி முதல் இன்னிங்ஸில் 133.3 ஓவா்களில் 438 ரன்கள் சோ்த்து ஆட்டமிழந்தது.
முன்னதாக தமிழ்நாடு, வியாழக்கிழமை முடிவில் 6 விக்கெட்டுகள் இழப்புக்கு 324 ரன்கள் சோ்த்திருந்தது. இந்நிலையில், 3-ஆம் நாளான வெள்ளிக்கிழமை முகமது அலி, அஜித் ராம் ஆகியோா் ஆட்டத்தை தொடா்ந்தனா். இதில் அஜித் ராம் 3 பவுண்டரிகளுடன் 27, லக்ஷய் ஜெயின் 0 ரன்களுக்கு வெளியேற, சதத்தை நெருங்கிய முகமது அலி, 10 பவுண்டரிகள், 1 சிக்ஸருடன் 91 ரன்களுக்கு வீழ்த்தப்பட்டாா்.
10-ஆவது வீரராக குா்ஜப்னீத் சிங் 3 பவுண்டரிகளுடன் 24 ரன்களுக்கு ஆட்டமிழக்க, தமிழ்நாடு இன்னிங்ஸ் நிறைவடைந்தது. பிரணவ் ராகவேந்திரா 12 ரன்களுடன் கடைசி வீரராக களத்திலிருந்தாா். ரயில்வேஸ் தரப்பில் குணால் யாதவ் 5, ஷிவம் சௌதரி 3, ஹிமான்ஷு சங்வான், யுவராஜ் சிங் ஆகியோா் தலா 2 விக்கெட்டுகள் எடுத்தனா்.
இதையடுத்து, 209 ரன்கள் பின்தங்கிய நிலையில் 2-ஆவது இன்னிங்ஸை தொடங்கிய ரயில்வேஸ், வெள்ளிக்கிழமை ஆட்டநேர முடிவில் 5 விக்கெட்டுகள் இழப்புக்கு 169 ரன்கள் சோ்த்து, 40 ரன்கள் பின்தங்கியுள்ளது. முகமது சைஃப் 52, ஷிவம் சௌதரி 1 ரன்னுடன் ஆட்டமிழக்காமல் உள்ளனா்.
கேப்டன் பிரதம் சிங் 0, விவேக் சிங் 8 பவுண்டரிகள், 1 சிக்ஸருடன் 63, சூரஜ் அஹுஜா 5 பவுண்டரிகள், 1 சிக்ஸா் உள்பட 36, உபேந்திர யாதவ் 1, பாா்கவ் மெராய் 1 ரன்னுக்கு வெளியேற்றப்பட்டனா். தமிழ்நாடு பௌலா்களில் சோனு யாதவ் 2, குா்ஜப்னீத் சிங், அஜித் ராம், லக்ஷய் ஜெயின் ஆகியோா் தலா 1 விக்கெட் சாய்த்தனா்.
அன்ஷுல் காம்போஜ் ‘10’
கேரளத்துக்கு எதிரான ஆட்டத்தில் ஹரியாணா பௌலா் அன்ஷுல் காம்போஜ், ஒரே இன்னிங்ஸில் 10 விக்கெட்டுகள் வீழ்த்தி சாதனை படைத்தாா். அவா் 30.1 ஓவா்களில் 49 ரன்களே கொடுத்து அனைத்து விக்கெட்டுகளையும் சாய்த்தாா். கேரள அணி 291 ரன்களுக்கு ஆட்டமிழந்தது.
ரஞ்சி கிரிக்கெட் வரலாற்றில் ஒரே இன்னிங்ஸில் இவ்வாறு 10 விக்கெட்டுகள் சாய்த்த 3-ஆவது பௌலா் என்ற பெருமையை அன்ஷுல் பெற்றாா். இதற்கு முன் பெங்கால் வீரா் பிரேமங்ஷு சாட்டா்ஜி (10/20 - அஸ்ஸாம் - 1956), ராஜஸ்தான் வீரா் பிரதீப் சுந்தரம் (10/78 - விதா்பா - 1985) ஆகியோா் அவ்வாறு 10 விக்கெட்டுகள் எடுத்துள்ளனா்.
