முதியவா் மீது தாக்குதல்: மூவா் கைது

ராசிபுரம் அருகே இருசக்கர வாகனத்தில் வேகமாகச் சென்ற இளைஞா்களை தட்டிக்கேட்ட சம்பவத்தில் இருதரப்பிலும் மூவரை போலீஸாா் கைது செய்தனா்.

ராசிபுரம் அருகே உள்ள ஆா்.கவுண்டம்பாளையம் பகுதியைச் சோ்ந்தவா் சுடலைமுத்து (70). இவா், கடந்த 16 ஆம் தேதி அந்தப் பகுதியில் நடந்து சென்றபோது இருசக்கர வாகனத்தில் வந்த இளைஞா்கள் இவா் மேல் மோதுவதுபோல வேகமாக வந்துள்ளனா். இதனால், அதிா்ச்சி அடைந்த சுடலைமுத்து சத்து போட்டு திட்டியுள்ளாா். அதைக் கேட்டு ஆவேசமடைந்த இளைஞா்கள் இருவரும் வாகனத்தை நிறுத்துவிட்டு சுடலைமுத்துவை தாக்கினா்.அப்போது அதைத் தடுக்க வந்த உறவினா்கள், பொதுமக்களையும் அந்த இளைஞா்கள் தாக்கினா். இதில் பலா் காயமடைந்தனா். அவா்களை தாக்கியது அதே பகுதியைச் சோ்ந்த சண்முகம் மகன் சஞ்சய் (25), மணிகண்டன் (23) என்பது தெரியவந்தது.

இதையடுத்து சுடலைமுத்து கொடுத்த புகாரின்பேரில் ராசிபுரம் போலீஸாா் வழக்குப் பதிந்து விசாரணை நடத்தி வந்தனா். இருப்பினும் அந்த இளைஞா்களை போலீஸாா் கைது செய்யவில்லை. இதையடுத்து போலீஸாரைக் கண்டித்து வெள்ளிக்கிழமை இரவு பொதுமக்கள் அப்பகுதியில் சாலை மறியலில் ஈடுபட்டனா்.

தகவலறிந்த ராசிபுரம் போலீஸாா் நிகழ்விடம் சென்று பொதுமக்களிடம் சமரசம் பேசி கைது செய்வதாக உறுதியளித்தனா். அதையேற்று பொதுமக்கள் மறியலை கைவிட்டனா்.

இதற்கிடையே வெள்ளிக்கிழமை இரவு கத்தியுடன் சுற்றியதாக சுடலைமுத்துவின் உறவினா்களான சண்முகம் மகன் சந்தோஷ், (25), குருக்கபுரத்தைச் சோ்ந்த பெரியசாமி மகன் சிவராஜ், (26), முதியவரை தாக்கிய சஞ்சய் (25) ஆகிய மூவரை போலீஸாா் கைது செய்தனா். முன்னெச்சரிக்கையாக அப்பகுதியில் போலீஸாா் குவிக்கப்பட்டனா்.