ஜீன் தெரபி சிகிச்சைக்கு ஜிஎஸ்டி விலக்கு: நிர்மலா சீதாராமன் அறிவிப்பு
சமீபத்தில் வெளியான தெலுங்கு திரைப்படம் புஷ்பா 2 இந்தியா முழுவதும் மிகப் பெரிய வெற்றியைப் பெற்றுள்ளது.
சுகுமார் இயக்கத்தில் அல்லு அர்ஜுன், ராஷ்மிகா மந்தன்னா, நடிப்பில் 2021ம் ஆண்டு வெளியான திரைப்படம் புஷ்பா. இதன் இரண்டாம் பாகம் கடந்த டிசம்பர் 5ம் தேதி வெளியானது. ஆந்திரா, தெலுங்கானாவில் மட்டுமல்லாமல் வட இந்திய மாநிலங்களிலும் வெற்றி நடைபோடுகிறது புஷ்பா 2 திரைப்படம்.
16 நாட்களில் இதுவரை எந்த பாலிவுட் திரைப்படமும் எட்டாத வசூலை வட இந்திய மாநிலங்களில் குவித்துள்ளது.
டிசம்பர் 19ம் தேதியுடன், ரூ.1508 கோடி வசூல் செய்துள்ளதாக படக்குழு தெரிவித்துள்ளது. இந்தியா திரைப்படங்களிலேயே அதிகம் வசூல் செய்த திரைப்படமான தங்கல் படத்தின் 2051 கோடி ரூபாய் வசூல் சாதனையை புஷ்பா முறியடிப்பதற்கான வாய்ப்புகள் உள்ளது என்கின்றனர்.
ஆமிர் கானின் தங்கல் திரைப்படம்தான் 2000 கோடிக்கு மேல் வசூல் செய்த ஒரே இந்தியத் திரைப்படம் என்பது குறிப்பிடத்தக்கது.
1000 கோடிக்கு மேல் வசூல் செய்த பிற இந்தியப்படங்கள் எவை எனப் பார்க்கலாம்.
1. தங்கல்
நிதிஷ் திவாரி இயக்கிய இந்தப் படத்தில், ஆமிர் கான், சாக்ஷி திவாரி, பாத்திமா சனா ஷேக் ஆகியோர் நடித்திருந்தனர். 90 கோடி பட்ஜெட்டில் உண்மைக் கதையைத் தழுவி எடுக்கப்பட்ட இந்தத் திரைப்படம் இந்திய திரைப்படங்களிலேயே அதிகபட்ச வசூல் செய்த திரைப்படம் என்ற பெருமையைக் கொண்டுள்ளது.
2. பாகுபலி 2
எஸ்.எஸ்.ராஜமௌலி இயக்கத்தில் பிரபாஸ், ராணா டகுபதி, அனுஷ்கா நடிப்பில் வெளியான திரைப்படம் பாகுபலி 2. இதன் முதல் பாகமே சிறப்பான வெற்றியைப் பெற்றிருந்ததால் 250 கோடியில் பிரம்மாண்டமாக உருவாக்கப்பட்ட இந்த திரைப்படம் 1814 கோடி வசூல் செய்தது.
3. ஆர்.ஆர்.ஆர் (RRR)
பாகுபலி படங்களின் வெற்றிக்குப் பிறகு ராஜமௌலி இந்திய விடுதலைப் போராட்டத்தில் பங்கெடுத்த இரண்டு வீரர்களை இன்ஸ்பிரேஷனாகக் கொண்டு எடுத்த திரைப்படம் ஆர்.ஆர்.ஆர். ஜூனியர் என்.டி.ஆர், ராம் சரண், அஜய் தேவகன் நடித்திருந்தனர்.500 கோடி ரூபாய் பட்ஜெட்டில் எடுக்கப்பட்ட இந்தத் திரைப்படம் 1288 கோடி ரூபாய் வசூலை அள்ளியது.
4. கே.ஜி.எஃப் 2
கே.ஜி.எஃப் திரைப்படத்தின் வெற்றிக்குப் பிறகு ரசிகர்களின் பலத்த எதிர்பார்ப்புக்கு மத்தியில் வெளியான திரைப்படம் கே.ஜி.எஃப் 2. பிரசாந்த் நீல் இயக்கத்தில் கோலார் தங்க வயல் நிலப்பரப்பை அடிப்படையாகக் கொண்டு உருவாக்கப்பட்ட திரைப்படம் இது. ராக்கி பாயாக யஷ் மாஸ் செய்த இந்த திரைப்படம் 150 கோடி பட்ஜெட்டில் எடுக்கப்பட்டு 1208 கோடி ரூபாய் வசூல் செய்தது. கே.ஜி.எஃப் மூலம் கன்னட திரைத்துறைக்கு பிரசாந்த் நீல் புத்துயிர் ஊட்டினார் என்றே கூறலாம்.
5. பதான்
சித்தார்த் ஆனந்த் இயக்கத்தில், ஷாருக் கான், தீபிகா படுகோன், ஜான் ஆபிரகாம் நடித்து வெளியான திரைப்படம் பதான். பாய்காட் பிரச்னைகளாலும் எந்த திரைப்படும் எதிர்பார்த்த வெற்றியைப் பெறாததாலும் முடங்கியிருந்த பாலிவுட்டுக்கு மிகப் பெரிய வெற்றியாக அமைந்தது பதான் திரைப்படம். 250 கோடி ரூபாய் பட்ஜெட்டில் பிரம்மாண்டமாக எடுக்கப்பட்ட இந்த திரைப்படம் 1050 கோடி ரூபாய் வசூல் செய்துள்ளது.
6.ஜவான்
தமிழ் திரைப்பட இயக்குநர் அட்லி இயக்கத்தில் ஷாருக் கான், நயன்தாரா, விஜய் சேதுபதி நடித்த திரைப்படம் ஜவான். 300 கோடி பட்ஜெட்டில் உருவான இந்த திரைப்படம் 1152 கோடி ரூபாய் வசூல் செய்துள்ளது.
7. கல்கி
நாக் அஷ்வின் இயக்கத்தில் பிரபாஸ், அமிதாப் பட்சன், கமல் ஹாசன் நடிப்பில் உருவான திரைப்படம் கல்கி 2898 ஏ.டி. எதிர்காலத்தில் நடப்பாத அமைந்த இந்த அறிவியல் புனைவு திரைப்படம் 550 கோடி ரூபாய் செலவில் உருவாக்கப்பட்டது. 1052 கோடி ரூபாய் வசூல் செய்தது.
(Source: IMDB)
