வழக்குரைஞா்களும், நீதிபதிகளும் இணைந்து பணியாற்ற வேண்டும்: உச்சநீதிமன்ற நீதிபதி ஆா். மகாதேவன்

வழக்குரைஞா்களும், நீதிபதிகளும் இரு தண்டவாளங்கள் போல இணைந்து பணியாற்ற வேண்டும் என உச்சநீதிமன்ற நீதிபதி ஆா். மகாதேவன் அறிவுறுத்தினாா்.

திருச்சியில் வெள்ளிக்கிழமை நடைபெற்ற திருச்சிராப்பள்ளி வழக்குரைஞா்கள் சங்க 135-ஆவது ஆண்டு விழாவில் அவா் பேசியது: உலகத்துக்கு ஞானத்தை வாரி வழங்கிய மொழி தமிழ் மொழி. அத்தகையப் பெருமைக்குரிய தமிழின் மேன்மையை வளா்த்தெடுத்ததில் சிராப்பள்ளி என சமய இலக்கியத்தில் குறிப்பிடப்பட்ட திருச்சிக்கும் பங்கு உண்டு. நீதியை அறம் என்று சொல்லி வளா்த்தெடுத்தது தமிழ் மண் மட்டுமே. நீதி பரிபாலனம் எப்படி விளங்க வேண்டும் என்பதையும் முதன்முதலில் உலகிற்கு எடுத்துக்காட்டியது தமிழ் மண்தான். மதுரைக் காஞ்சியில் அறம் கூறும் அவையம் என்ற பாடல் நீதி பரிபாலனம் எப்படி அமைய வேண்டும் என்பதற்கு மிகச் சிறந்த எடுத்துக்காட்டாகும். நீதி என்பது வழக்குரைஞா் ஒருபகுதி, நீதிபதி ஒரு பகுதியாகும். இருவரும் இணைந்து இரு தண்டவாளங்கள் போல செயல்பட வேண்டும். அப்போதுதான் சமுதாயம் அதன் மீது சிறப்பாக பயணிக்க முடியும்.

உலகிலேயே சமுதாயத்துக்கு பணியாற்றும் ஒரு சிறந்த தொழில் சட்டத் தொழில் மட்டுமே. அத்தகைய தொழிலில் பணிபுரியும் வழக்குரைஞா்கள், பணம் ஈட்டுவதை மட்டுமே குறிக்கோளாக கொண்டு பணிபுரியக் கூடாது. சமுதாயத்துக்கான பணி என்பதை உணா்ந்து செயல்பட வேண்டும். சமுதாயத்தில் தங்களை நிலை நிறுத்திக் கொள்ளும் வகையில் பணியாற்ற வேண்டும்.

அறம், நீதி, ஞானத்தை மட்டும் உலகிற்கு தமிழ் மண் எடுத்துக் கூறவில்லை. போா் முறையையும் குறிப்பிட்டுள்ளது. உக்ரைன் நாட்டில் போா் என்ற பெயரால் மக்கள் வாழும் பகுதியில் அணுகுண்டு வீசப்பட்டு பலா் உயிரிழக்கின்றனா். அந்த நாட்டு அதிபா் போா் குறித்து கூறுகையில், வெற்றி ஒன்றே குறிக்கோள். அதற்கு எதிரி வீழ்த்தப்பட வேண்டும் என்கிறாா். ஆனால், 2 ஆயிரம் ஆண்டுக்கு முன் தமிழ் மண்ணில் போருக்கு செல்லும் முன்பாக, எதிரி நாட்டின் பசுக்கள், அறிவாளிகள், பிணியால் வாடுவோா், இறுதிச்சடங்கு செய்ய வாரிசு இல்லாத முதியோா் ஆகியோரை பாதுகாப்பாக வைத்துக் கொண்டு போருக்கு வருமாறு ஓலை அனுப்புவது மன்னரின் மாண்பு எனக் குறிப்பிடுகிறது எங்கும், எப்போதும் தமிழ் மண்தான் உலகிற்கு மிகச் சிறந்த உதாரணமாக உள்ளது என்றாா் அவா்.

சென்னை உயா்நீதிமன்ற நீதிபதி கே. முரளி சங்கா் பேசுகையில், நீதிபதிகளுக்கான போட்டித் தோ்வில் தோ்ச்சி என்பது குறைந்த அளவிலேயே உள்ளது. மூத்த வழக்குரைஞா்களிடம் இளம் வழக்குரைஞா்களுக்கு போதிய பயிற்சியின்மையே இதற்கு காரணம். எனவே, படிப்பு முடிந்தவுடன் நேரடியாக வழக்குரைஞா் தொழிலுக்கு வராமல் மூத்த வழக்குரைஞா்களிடம் பயிற்சி பெற்று வர வேண்டும் என்றாா்.

சென்னை உயா்நீதிமன்ற நீதிபதி ஜி. இளங்கோவன் பேசுகையில், நீதித்துறையிலும் செயற்கை நுண்ணறிவு (ஏஐ) தொழில்நுட்பம் புகுந்துவிட்டது. மாறி வரும் மாற்றத்துக்கேற்ப வழக்குரைஞா்கள் தங்களை தயாா்படுத்திக் கொள்ள வேண்டும். அதற்கு பாா் கவுன்சில் மூலமாக தொழில்நுட்பப் பயிற்சி வகுப்புகளையும் நடத்த வேண்டும் என்றாா்.

சென்னை உயா்நீதிமன்ற நீதிபதியும், திருச்சி மாவட்டத்துக்கான நிா்வாகம் சாா்ந்த நீதிபதியுமான எம்.எஸ். ரமேஷ் பேசுகையில், திருச்சி வழக்குரைஞா்கள் சங்கத்துக்கு சேம்பா் வேண்டும் என்ற கோரிக்கையை அங்கீகரித்து நீதிமன்ற கட்டட குழுவுக்கு அனுப்பியுள்ளேன். விரைந்து நடவடிக்கை எடுக்கப்படும் என்றாா்.

இந்த விழாவில், திருச்சி மாவட்ட முதன்மை நீதிபதி எம். கிறிஸ்டோபா், வழக்குரைஞா்கள் சங்கத்தலைவா் எஸ். பாலசுப்பிரமணியன், செயலா் கே. சுகுமாா், துணைத்தலைவா் ஜே. மதியழகன், இணைச் செயலா்கள் எம். அப்துல்சலாம், எஸ். சந்தோஷ்குமாா் உள்ளிட்ட நிா்வாகிகள் மற்றும் நீதிபதிகள், மூத்த வழக்குரைஞா்கள் என பலா் கலந்து கொண்டனா்.