வாக்காளா் பட்டியல் தயாரிப்பு வெளிப்படையான நடைமுறை: தலைமைத் தோ்தல் ஆணையா் ஞானேஷ் குமாா்

‘இந்தியாவில் வாக்காளா் பட்டியல் தயாரிப்புப் பணி என்பது உலகிலேயே மிகவும் கடினமான மற்றும் வெளிப்படையான நடைமுறை’ என்று தலைமைத் தோ்தல் ஆணையா் ஞானேஷ் குமாா் தெரிவித்தாா்.

மேலும், ‘ஒவ்வோா் ஆண்டும் வாக்காளா் பட்டியலில் திருத்தங்கள் மேற்கொள்ளப்படுகிறபோதும், தோ்தல்களுக்கு முன்பாகவும் சட்டத்துக்கு உட்பட்டு இறுதி வாக்காளா் பட்டியல் அங்கீகரிக்கப்பட்ட தேசிய மற்றும் மாநிலக் கட்சிகளுக்கு வழங்கப்படுகின்றன’ என்றும் அவா் குறிப்பிட்டாா்.

தில்லி உயா்நீதிமன்றத்தில் நடைபெற்ற தோ்தல் வழக்கு ஒன்றில் நிகழாண்டு தொடக்கத்தில் தோ்தல் ஆணையம் தாக்கல் செய்த பதில் மனு தொடா்பான ஊடகச் செய்தியை தனது எக்ஸ் பக்கத்தில் ராகுல் காந்தி திங்கள்கிழமை பகிா்ந்து வெளியிட்ட பதிவில், ‘ஹரியாணா மற்றும் மகாராஷ்டிர மாநிலங்களின் 2009 முதல் 2024-ஆம் ஆண்டு வரையிலான வாக்காளா் பட்டியல் தரவுகளைப் பகிா்வதற்கு தோ்தல் ஆணையம் எடுத்துள்ள முதல் படி வரவேற்கத்தக்கது. ஆனால், இந்தத் தரவுகள் எந்தத் தேதியில் பகிரப்படும் என்பதை தோ்தல் ஆணையம் அறிவிக்க முடியுமா?’ என்று கேள்வி எழுப்பியிருந்தாா். இதற்கு பதிலளிக்கும் வகையில் தலைமைத் தோ்தல் ஆணையா் இத் தகவலைத் தெரிவித்துள்ளாா்.

தில்லியில் நடைபெற்ற நிகழ்ச்சியில் பங்கேற்ற தலைமைத் தோ்தல் ஆணையா் ஞானேஷ் குமாா் இதுகுறித்துப் பேசியதாவது:

இந்தியாவில் வாக்காளா் பட்டியல் தயாரிப்புப் பணி என்பது உலகிலேயே மிகவும் கடினமான மற்றும் வெளிப்படையான நடைமுறையாகும். இந்த வலுவான நடைமுறை, பல ஆண்டுகளாக நாடு முழுவதும் தோ்தல் நம்பகத்தன்மையை நிலைநிறுத்துவதில் முக்கியப் பங்கு வகித்து வருகிறது.

1960-ஆம் ஆண்டுமுதல் வாக்காளா் பட்டியல் தொடா்பான தரவுகள் அங்கீகரிக்கப்பட்ட அரசியல் கட்சிகளுடன் பகிரப்பட்டு, அவா்களிடமிருந்து ஆட்சேபங்கள், மேல்முறையீடுகள் பெறப்பட்டு நடவடிக்கை மேற்கொள்ளப்பட்டு வருகிறது.

ஒட்டுமொத்த தோ்தல் செயல்முறையும் அரசியல் கட்சிகள், வேட்பாளா்கள், பொதுமக்கள், காவல் துறையினா், செலவினப் பாா்வையாளா்கள் மற்றும் ஊடகங்களால் உன்னிப்பாகக் கண்காணிக்கப்படுகின்றன என்றாா்.