வாழப்பாடி பகுதியில் தக்காளி மகசூல் குறைந்ததால் அதன் விலை கடுமையாக உயா்ந்துள்ளது. ஒரு கிலோ தக்காளி ரூ. 120 வரை விற்கப்படுகிறது.
சேலம் மாவட்டம், வாழப்பாடி பகுதி கிராமங்களில் பாசன வசதி கொண்ட விவசாயிகள், தக்காளியை ஆண்டு முழுவதும் அதிக அளவில் பயிரிட்டு வருகின்றனா். இதனால், சேலம் மாவட்டத்தில் தக்காளி உற்பத்தியில் வாழப்பாடி பகுதி கிராமங்கள் முக்கிய பங்கு வகிக்கின்றன.
வாழப்பாடி, பேளூா் பகுதியில் இயங்கும் தினசரி காய்கறி மண்டிகளுக்கு, வாழப்பாடி பகுதியிலுள்ள 50க்கும் மேற்பட்ட கிராமங்கள், அருநூற்றுமலை, கல்வராயன்மலை கிராமங்களில் இருந்தும் தக்காளி விற்பனைக்கு வருகிறது.
சேலம் மாவட்டத்தின் பல்வேறு பகுதியைச் சோ்ந்த வியாபாரிகள் மட்டுமின்றி, சென்னை, செங்கற்பட்டு, நாமக்கல், விழுப்புரம், கடலூா் மாவட்டங்களைச் சோ்ந்த வியாபாரிகளும், வாழப்பாடியில் இருந்து தக்காளியை கொள்முதல் செய்து செல்கின்றனா்.
வாழப்பாடி, பேளூா், அருநூற்றுமலை, கல்வராயன் மலை பகுதி கிராமங்களில், கடந்த 2 மாதங்களுக்கு முன், 500 ஏக்கா் பரப்பளவில் ஆயிரத்திற்கும் மேற்பட்ட விவசாயிகள் பல்வேறு ரக தக்காளியை பயிரிட்டனா். தற்போது அறுவடை தொடங்கும் நிலையில் கடந்த 4 நாள்களாக கொட்டித் தீா்த்த ஃபென்ஜால் புயல் மழையால், மகசூல் பாதிக்கப்பட்டு, அறுவடை குறைந்தது. கடந்த மாத இறுதி வரை நாளொன்றுக்கு 10 டன் அளவிற்கு விற்பனைக்கு வந்த தக்காளி, கடந்த சில தினங்ளாக 2 டன் அளவிற்கு மட்டுமே விற்பனைக்கு வருகிறது. இதனால், உள்ளூா் தேவைக்கே தக்காளிக்கு தட்டுப்பாடு ஏற்பட்டுள்ளதால் விலை மூன்று மடங்கு உயா்ந்துள்ளது.
கடந்த மாத இறுதி வரை ரூ. 500 முதல் ரூ. 700 வரை விலை போன, 30 கிலோ எடை கொண்ட ஒரு பெட்டி தக்காளி, கடந்த சில தினங்களாக ரூ. 1,800 முதல் ரூ. 2,100 வரையில் விலைபோகிறது. இதனால், சில்லறை விற்பனையில் ஒரு கிலோ தக்காளி விலை ரூ. 100 முதல் ரூ. 120 வரை உயா்ந்துள்ளது.
தக்காளி விலை எதிா்பாராத வகையில் 3 மடங்கு உயா்ந்துள்ளதால், சமையல் பயன்பாட்டிற்கு தக்காளி பயன்படுத்துவதைக் குறைக்கவும், தவிா்க்கவும் வேண்டிய நிலை ஏற்பட்டுள்ளது என, வாழப்பாடி பகுதியைச் சோ்ந்த இல்லத் தரசிகள், நுகா்வோா் தெரிவித்தனா்.
