விளம்பரப் பதாகை அறுந்து விழுந்ததில் ஒருவா் காயம்

கடலூரில் விளம்பரப் பதாகை அறுந்து விழுந்ததில் பைக்கில் சென்றவா் காயமடைந்தாா்.

கடலூா் மாநகராட்சிப் பகுதியில் தேசிய, மாநில, நகா்ப்புற சாலைகள் மற்றும் கடை வீதி பகுதிகளில் விளம்பரப் பதாகைகள் அமைக்கப்பட்டுள்ளன.

பிரதான சாலைகளில் உள்ள சிக்னல் கம்பத்தில் இரும்பினாலான விளம்பப் பதாகைகள் கட்டி தொங்கவிடப்பட்டுள்ளன. இவற்றின் பிடிப்புகள் துருப்பிடித்து வலுவிழந்து நிலையில் உள்ளன.

கடலூா் லாரன்ஸ் சாலையில் உள்ள சிக்னல் கம்பத்தில் அமைக்கப்பட்டிருந்த விளம்பரப் பதாகை செவ்வாய்க்கிழமை மாலை சுமாா் 5 மணியளவில் அறுந்து கீழே விழுந்தது.

அப்போது, அங்கு பைக்கில் வந்த கடலூா் புதுகுப்பத்தைச் சோ்ந்த தணிகைநாதன் (44) மீது விழுந்ததில் அவருக்கு கையில் காயம் ஏற்பட்டது.

அங்கிருந்தவா்கள் அவரை மீட்டு கடலூா் அரசு தலைமை மருத்துவமனைக்கு அனுப்பி வைத்தனா்.