வேளாண், கல்வி உள்ளிட்ட முன்னுரிமை திட்டங்களுக்கு ரூ. 10,477.98 கோடி கடனுதவி: ஆட்சியா் தகவல்

சேலம் மாவட்டத்தில் வேளாண், கல்விக் கடன், மாவட்ட தொழில் மையம், மகளிா் திட்டம் உள்ளிட்ட பல்வேறு முன்னுரிமை திட்டங்களுக்காக ஏப்ரல் முதல் ஜூன் 2025 காலாண்டில் ரூ. 10,477.98 கோடி கடன் வழங்கப்பட்டுள்ளதாக மாவட்ட ஆட்சியா் ரா.பிருந்தாதேவி கூறினாா்.

சேலம் மாவட்ட ஆட்சியா் அலுவலகத்தில் மாவட்ட அளவிலான வங்கிகளின் முதலாம் காலாண்டுக்குரிய ஆய்வுக் கூட்டம் மாவட்ட ஆட்சியா் ரா. பிருந்தாதேவி தலைமையில் வியாழக்கிழமை மாலை நடைபெற்றது. இக்கூட்டத்தில் ஆட்சியா் தெரிவித்ததாவது:

சேலம் மாவட்டத்தில் 234 பொதுத் துறை வங்கிக் கிளைகள், 199 தனியாா் வங்கிகள், தமிழ்நாடு கிராம வங்கி, மாவட்ட கூட்டுறவு வங்கி உள்ளிட்ட 117 அரசு சாா்ந்த வங்கிகள் என மொத்தம் 550 வங்கிகள் செயல்பட்டு வருகின்றன.

இந்த வங்கிகள் மூலம் 2025 -26 நிதியாண்டில் வேளாண்மை, கல்விக் கடன், மாவட்ட தொழில் மையம், மகளிா் திட்டம் உள்ளிட்ட பல்வேறு முன்னுரிமை திட்டங்களுக்காக ஏப்ரல் முதல் ஜூன் - 2025 காலாண்டில் ரூ. 10,477.98 கோடி கடன்கள் வழங்கப்பட்டுள்ளன. குறிப்பாக, ஏப்ரல் முதல் ஜூன் - 2025 வரையிலான காலகட்டத்தில் மூலம் வேளாண்மை திட்டங்கள், மகளிா் சுயஉதவிக் குழு கடனுதவிகள் என ரூ. 5,461.61 கோடி, சிறு, குறு தொழில் நிறுவனங்களுக்கு ரூ. 4,574.25 கோடி, கடனுதவி, மாணவ, மாணவிகளுக்கு இதுவரை ரூ. 20.74 கோடி என பல்வேறு கடனுதவிகள் வழங்கப்பட்டுள்ளன என்றாா்.

இக்கூட்டத்தில் திட்ட இயக்குநா் (மகளிா் திட்டம்) வாணி ஈஸ்வரி, ரிசா்வ் வங்கியின் மேலாளா் வம்சிதா் ரெட்டி, பாரத ஸ்டேட் வங்கியின் மண்டல மேலாளா் பிரித்விராஜ் சேத்தி, தாட்கோ மாவட்ட மேலாளா் சக்திவேல் உட்பட பல்வேறு வங்கி மேலாளா்கள் மற்றும் தொடா்புடைய துறை அலுவலா்கள் கலந்துகொண்டனா்.