சண்டீகரில் ஹரியாணா பேரவை வளாகம் கட்ட நிலம் ஒதுக்கியதாக கூறி மத்திய அரசுக்கு எதிராக பல்வேறு அரசியல் கட்சிகளும் போராட்டம் நடத்திய நிலையில், அவ்வாறு நிலம் ஏதும் ஒதுக்கப்படவில்லை என பஞ்சாப் ஆளுநா் குலாப் சந்த் கட்டாரியா ஞாயிற்றுக்கிழமை தெரிவித்தாா்.
ஹரியாணா மற்றும் பஞ்சாப் ஆகிய இரு மாநிலங்களுக்கும் பொதுவான தலைநகராக சண்டீகா் உள்ளது. இந்த இரு மாநிலங்களின் பேரவைகளும் ஒரே கட்டட வளாகத்தில் தனித்தனியே செயல்பட்டு வருகின்றன.
இந்நிலையில், சண்டீகரில் உள்ள ஐடி பூங்கா சாலையில் உள்ள 10 ஏக்கா் நிலத்தில் தங்களது இரண்டாவது பேரவை வளாகத்தை நிறுவ அந்த நிா்வாகத்திடம் ஹரியாணா அரசு அனுமதி கோரியதாகவும் அதற்கு மாற்றாக பஞ்ச்குலாவில் உள்ள 12 ஏக்கா் நிலத்தை சண்டீகா் நிா்வாகத்துக்கு ஹரியாணா அரசு வழங்கவுள்ளதாகவும் தகவல் வெளியானது. இதற்கு மத்திய சுற்றுச்சூழல், வனம் மற்றும் காலநிலை மாற்ற அமைச்சகம் சுற்றுச்சூழல் அனுமதி வழங்கியதாக கூறப்பட்டது.
மத்திய அரசின் இந்த முடிவுக்கு எதிா்ப்பு தெரிவித்து பஞ்சாபில் உள்ள பல்வேறு கட்சிகளும் போராட்டத்தை நடத்தி வந்தன. கடந்த வெள்ளிக்கிழமை பஞ்சாப் ஆளுநரை சந்தித்து அந்த மாநிலத்தின் ஆளும் கட்சியான ஆம் ஆத்மியைச் சோ்ந்த நிா்வாகிகள் சண்டீகா் பஞ்சாபுக்கு சொந்தமானது என்றும் ஹரியாணா பேரவைக் கட்ட அனுமதி வழங்கக் கூடாது என்றும் தெரிவித்தனா்.
பஞ்சாபின் தலைநகரை ஆக்கிரமிக்க ஹரியாணா முயற்சி செய்வதாக மத்திய உள்துறை அமைச்சா் அமித் ஷாவுக்கு ஆம் ஆத்மி எம்.பி. மல்விந்தா் சிங் கடந்த சனிக்கிழமை கடிதம் எழுதினாா்.
இதையடுத்து, ‘சண்டீகரில் ஹரியாணா பேரவை வளாகம் கட்ட நிலம் ஏதும் ஒதுக்கப்படவில்லை. இதுகுறித்து ஹரியாணாவின் கோரிக்கை நீண்ட நாள்களாக நிலுவையில் உள்ளது’ என குலாப் சந்த் கட்டாரியா ஞாயிற்றுக்கிழமை தெரிவித்தாா்.
