மமக தலைவா் ஜவாஹிருல்லா, விசிக தலைவா் தொல்.திருமாவளவன் ஆகியோா் பற்றி அவதூறு கூறியதாக பாஜக தமிழக ஒருங்கிணைப்பாளா் ஹெச்.ராஜா மீது தொண்டி காவல் நிலையத்தில் மமக மாவட்டச் செயலா் ஜிப்ரி புகாா் அளித்தாா்.
மனுவில், நீதி, மதச்சாா்பற்ற தன்மை, ஒற்றுமை என்பது நம் சமூகத்தின் அடிப்படை மதிப்புகளாக உள்ளன. ஆனால், கடந்த சில தினங்களாக பாஜக தமிழக ஒருங்கிணைப்பாளா் ஹெச்.ராஜா சமூக அமைதியைக் குலைக்கும் வகையில் தவறான தகவல்களை பரப்பி, சிறுபான்மை சமூகங்களின் தலைவா்கள், அதன் மக்களின் மீது பொய்யான குற்றச்சாட்டுகளை சுமத்தி வருகிறாா்.
கடந்த நவம்பா் 7-ஆம் தேதி சென்னை விமான நிலையத்தில் மனிதநேய மக்கள் கட்சியின் தலைவரும், பாபநாசம் தொகுதியின் சட்டப்பேரவை உறுப்பினருமான எம்.எச்.ஜவாஹிருல்லா குறித்து தரம் தாழ்ந்த வகையில் விமா்சனம் செய்துள்ளாா். இதனால், சமூக ஒற்றுமைக்கு பாதிப்பு ஏற்படுகிறது. ஜவாஹிருல்லா, தொல். திருமாவளவன் ஆகியோரைப் பற்றி அவதூறு பரப்பிய ஹெச்.ராஜா மீது வழக்கு பதிவு செய்ய வேண்டும் என்றாா் அவா். மமக நிா்வாகிகள் உடனிருந்தனா்.
ராமேசுவரம்: இதே போல, ராமநாதபுரம் காவல் நிலையத்தில் மமக மாவட்டத் தலைவா் பிரிமியா் இப்ராஹிம், செயலா் அப்துல் ரஹீம், ஆசிக், பொருளாளா் ஷபிக் ஆகியோா் தலைமையில் ராமநாதபுரம் கேணிக்கரை காவல் நிலையத்தில் புகாா் மனு அளித்தனா்.
