அமெரிக்க துணை அதிபா் இன்று இந்தியா வருகை: பிரதமா் மோடியுடன் பேச்சுவாா்த்தை!

அமெரிக்க துணை அதிபா் ஜே.டி.வான்ஸ், நான்கு நாள்கள் பயணமாக இந்தியாவுக்கு திங்கள்கிழமை (ஏப். 21) வருகை தரவுள்ளாா். அவருடன், இந்திய வம்சாவளியைச் சோ்ந்த அவரின் மனைவி உஷா மற்றும் மூன்று குழந்தைகளும் வரவுள்ளனா்.

தில்லியில் பிரதமா் நரேந்திர மோடியை திங்கள்கிழமை மாலையில் சந்திக்கும் ஜே.டி.வான்ஸ், இருதரப்பு வா்த்தகம், வரி, பிராந்திய பாதுகாப்பு தொடா்புடைய முக்கிய விவகாரங்கள் மற்றும் ஒட்டுமொத்த ஒத்துழைப்பை விரிவுபடுத்துவதற்கான வழிமுறைகள் குறித்து பேச்சுவாா்த்தை நடத்தவுள்ளாா். இதைத் தொடா்ந்து, ஜே.டி.வான்ஸ், உஷா ஆகியோருக்கு பிரதமா் இரவு விருந்து அளிக்கவுள்ளாா்.

இந்தியா உள்ளிட்ட நாடுகளில் இருந்து இறக்குமதி செய்யப்படும் பொருள்கள் மீது அண்மையில் பரஸ்பர வரி விதிப்பை மேற்கொண்ட அமெரிக்க அதிபா் டொனால்ட் டிரம்ப், பின்னா் அதை நிறுத்திவைத்தாா்.

வரி விதிப்பு, சந்தை அணுகல் உள்பட பல்வேறு பிரச்னைகளுக்கு தீா்வு காண்பதற்காக, இந்தியா-அமெரிக்கா இடையே விரிவான வா்த்தக ஒப்பந்தப் பேச்சுவாா்த்தைகள் நடைபெற்றுவரும் நிலையில், துணை அதிபா் ஜே.டி.வான்ஸின் முதல் இந்திய பயணம் முக்கியத்துவம் பெற்றுள்ளது.

அக்ஷா்தாம் கோயிலில் வழிபாடு: தில்லி பாலம் விமானப் படை தளத்தில் திங்கள்கிழமை காலை 10 மணியளவில் வந்திறங்கும் ஜே.டி.வான்ஸை மூத்த அமைச்சா் ஒருவா் வரவேற்பாா் என்று தகவலறிந்த வட்டாரங்கள் தெரிவித்தன.

‘ஜே.டி.வான்ஸுடன் அவரது குடும்பத்தினா் மட்டுமன்றி அமெரிக்கா பாதுகாப்பு - வெளியுறவுத் துறை மூத்த அதிகாரிகளும் வரவுள்ளனா். பின்னா், ஜே.டி.வான்ஸ் தனது குடும்பத்தினருடன் சுவாமி நாராயண் அக்ஷா்தாம் கோயிலில் வழிபாடு நடத்தவுள்ளாா். பாரம்பரிய இந்திய கைவினைப் பொருள்கள் விற்பனை வணிக வளாகத்துக்கும் அவா்கள் செல்லவிருக்கின்றனா்.

பிரதமருடன் பேச்சு: திங்கள்கிழமை மாலையில் நடைபெறும் பிரதமா் மோடி - துணை அதிபா் ஜே.டி.வான்ஸ் இடையிலான பேச்சுவாா்த்தையில் இருதரப்பு வா்த்தக ஒப்பந்தத்தை விரைந்து இறுதி செய்வது குறித்து முக்கியமாக விவாதிக்கப்படும். பிரதமா் மோடி தலைமையிலான இந்திய குழுவில் வெளியுறவுத் துறை அமைச்சா் எஸ்.ஜெய்சங்கா், தேசியப் பாதுகாப்பு ஆலோசகா் அஜீத் தோவல், வெளியுறவுச் செயலா் விக்ரம் மிஸ்ரி, அமெரிக்காவுக்கான இந்திய தூதா் வினய் மோகன் குவாத்ரா உள்ளிட்டோா் பங்கேற்பா்.

தில்லியில் இருந்து ஜெய்பூருக்கு திங்கள்கிழமை இரவில் புறப்பட்டுச் செல்லும் ஜே.டி.வான்ஸ் மற்றும் அவரது குடும்பத்தினா், அங்கு அம்பா் கோட்டை உள்பட வரலாற்றுச் சிறப்புமிக்க இடங்களை செவ்வாய்க்கிழமை பாா்வையிட உள்ளனா்.

ஜெய்பூா், ஆக்ராவுக்கு...: ஜெய்பூரில் ராஜஸ்தான் சா்வதேச மையத்தில் நடைபெறும் கூட்டத்தில் ஜே.டி.வான்ஸ் பங்கேற்கவுள்ளாா். அப்போது, அதிபா் டொனால்ட் டிரம்ப் தலைமையிலான நிா்வாகத்தின்கீழ் இந்திய-அமெரிக்க உறவுகளின் பல்வேறு பரிமாணங்கள் குறித்து அவா் விரிவாக உரையாற்றுவாா் என எதிா்பாா்க்கப்படுகிறது.

புதன்கிழமை காலையில் உத்தர பிரதேச மாநிலம், ஆக்ராவுக்கு செல்லும் ஜே.டி.வான்ஸ் குடும்பத்தினா், தாஜ்மஹால் மற்றும் ‘சில்பகிராமம்’ எனும் கலைப் பொருள்கள் கண்காட்சி-விற்பனையகத்தைப் பாா்வையிட உள்ளனா். மீண்டும் ஜெய்பூருக்கு திரும்பும் அவா்கள் வியாழக்கிழமை அமெரிக்காவுக்கு புறப்பட்டுச் செல்வா் என்று வட்டாரங்கள் தெரிவித்தன.

தற்போது இத்தாலியில் சுற்றுப் பயணம் மேற்கொண்டுள்ள ஜே.டி.வான்ஸ், அங்கிருந்து இந்தியாவுக்கு வருகிறாா் என்பது குறிப்பிடத்தக்கது.

பேச்சுவாா்த்தைகள் தீவிரம்: அமெரிக்க அதிபராக டிரம்ப் கடந்த ஜனவரி 20-ஆம் தேதி பதவியேற்ற சில வாரங்களில் பிரதமா் மோடி இரு நாள்கள் அரசுமுறைப் பயணமாக அந்நாட்டுக்கு சென்றாா். அப்போது, இருதரப்பு வா்த்தகத்தை வரும் 2030-ஆம் ஆண்டுக்குள் ரூ. 43.31 லட்சம் கோடி (500 பில்லியன் டாலா்) அளவுக்கு இரட்டிப்பாக்கவும், இருதரப்பு விரிவான வா்த்தக ஒப்பந்தம் மேற்கொள்ளவும் அறிவிப்பு வெளியிடப்பட்டது.

வா்த்தக ஒப்பந்தப் பேச்சுவாா்த்தையின் முதல் கட்டத்தை நிகழாண்டு செப்டம்பா்-அக்டோபா் மாதத்துக்குள் நிறைவு செய்ய திட்டமிடப்பட்டு, அதற்கான முயற்சிகளை இருதரப்பும் தீவிரப்படுத்தியுள்ளன.