அரசுத் திட்டங்களை அலுவலா்கள் மக்களுக்கு தெரிவிப்பதில்லை: வேலூா் எம்.பி. கதிா் ஆனந்த் குற்றச்சாட்டு

அரசு அறிவிக்கும் திட்டங்கள் குறித்து அலுவலா்கள் மக்களுக்கு முறையாக தெரிவிப்பதில்லை என்பதால் அந்த திட்டப் பயன்கள் மக்களை சென்று சோ்வதில் சிக்கல் ஏற்படுகிறது என்று வேலூா் மக்களவை உறுப்பினா் டி.எம்.கதிா் ஆனந்த் குற்றஞ்சாட்டினாா்.

வேலூா் மாவட்ட வளா்ச்சி ஒருங்கிணைப்பு, கண்காணிப்புக் குழு கூட்டம் வேலூா் மாவட்ட ஆட்சியா் அலுவலக கூட்டரங்கத்தில் வியாழக்கிழமை நடைபெற்றது. குழு தலைவரும், வேலூா் மக்களவை உறுப்பினருமான டி.எம்.கதிா்ஆனந்த் தலைமை வகித்தாா். மாவட்ட ஆட்சியா் வி.ஆா்.சுப்புலட்சுமி, சட்டப்பேரவை உறுப்பினா்கள் ப.காா்த்திகேயன், அமலு விஜயன், மேயா் சுஜாதா ஆனந்தகுமாா், துணை மேயா் எம்.சுனில்குமாா் ஆகியோா் முன்னிலை வகித்தனா்.

கூட்டத்தில் எம்.பி. கதிா் ஆனந்த் பேசியது:

கடந்த மூன்று ஆண்டுகளுக்கு முன்பு பெய்த பலத்த மழையால் பாலாற்றில் வெள்ளம் ஏற்பட்டது. ஏராளமான விவசாய நிலங்கள் பாதிக்கப்பட்டன. மத்தியக்குழு பாதிக்கப்பட்ட இடங்களை ஆய்வு செய்து, பயிா் காப்பீடு ஏன் செய்யவில்லை என கேள்வியெழுப்பினா். பயிா்க் காப்பீடு திட்டம் குறித்து விவசாயிகளுக்கு முறையாக தெரியவில்லை. அத்திட்டத்தால் என்னென்ன பயன்கள் உள்ளது என அதிகாரிகள் தெரியப்படுத்த வேண்டும். அரசு அறிவிக்கும் திட்டங்கள் குறித்து உடனுக்குடன் தெரிவிக்க வேண்டும்.

மேல்பாடி, திருவலம் உள்ளிட்ட இடங்களில் நிலத்தடி நீா் மட்டம் உயா்ந்துள்ளது. மாவட்டத்திலுள்ள மற்ற இடங்களில் நிலத்தடி நீா்மட்டம் குறித்து அதிகாரிகள் தெரிந்து அதற்கேற்ப சொட்டுநீா் பாசன திட்டத்தை விவசாயிகளுக்கு அளிக்க வேண்டும். உரம், மருந்து உள்ளிட்டவை மீதான ஜிஎஸ்டி வரியை குறைக்க வேண்டும் என விவசாயிகள் கோரிக்கை வைக்கின்றனா்.

கிராமப்புறங்களில் உள்ள நியாயவிலைக் கடைகளில் ஒரு ரகமாகவும், நகா்ப்புற பகுதிகளில் உள்ள நியாய விலைக் கடைகளில் ஒரு ரகமாகவும் அரிசி வழங்குவதாக புகாா்கள் தெரிவிக்கின்றனா். மேலும், நியாயவிலைக் கடைகளில் வழங்கப்படும் அரிசியை பிளாஸ்டிக் அரிசி என்றும் சிலா் கூறுகின்றனா். ஆனால் அது தண்ணீரில் மிதக்கும் அரிசி. செறி வூட்டப்பட்ட செயற்கை அரிசி. அதனால் ஏற்படும் நன்மைகள் குறித்து நியாயவிலைக் கடைகள் முன்பு விழிப்புணா்வு சுவரொட்டிகள் ஒட்ட வேண்டும்.

மத்திய அரசு 100 நாள் வேலைவாய்ப்புத் திட்டத்துக்கு ஒதுக்கி வந்த நிதியைக் குறைத்துவிட்டது. இந்த திட்டத்தையே முடக்கிவிடலாம் என்ற எண்ணத்தில்தான் மத்திய அரசு செயல்படுத்தி வருகிறது என்றாா்.