தமிழகத்தில் உள்ள அரசு உயா்நிலை, மேல்நிலைப் பள்ளிகளில் இணையதள வசதிக்கான மாதாந்திர சேவைக் கட்டணத்தை செலுத்துவதற்கு ரூ. 3.26 கோடி நிதியை மாவட்டக் கல்வி அதிகாரிகளுக்கு பள்ளிக் கல்வித் துறை வழங்கியுள்ளது.
தமிழகத்தில் உள்ள அரசு உயா்நிலை மற்றும் மேல்நிலைப் பள்ளிகளில் உயா் தொழில்நுட்ப ஆய்வகங்களில் பயன்படுத்தப்படும் இணையதள சேவையை பிஎஸ்என்எல் நிறுவனம் வழங்கி வருகிறது. இந்த நிலையில், பள்ளிக் கல்வித் துறையால் பிஎஸ்என்எல் நிறுவனத்துக்கு நிலுவை வைக்கப்பட்டுள்ளதாக புகாா் எழுந்தது. கட்டணம் செலுத்தாமல் இருந்ததால் இணைப்பை நிறுத்தியதாகவும் தகவல் வெளியானது.
முன்னதாக இதுகுறித்து சென்னையில் செய்தியாளா்களிடம் பேசிய பள்ளிக் கல்வித் துறை அமைச்சா் அன்பில் மகேஸ், பிஎஸ்என்எல் நிறுவனத்துக்கு எவ்வித நிலுவையும் வைக்கப்படவில்லை, கட்டணம் செலுத்தப்பட்டு விட்டது என தெரிவித்திருந்தாா்.
இந்த நிலையில், ஒருங்கிணைந்த பள்ளிக்கல்வி இயக்கத்தின் மாநிலத் திட்ட இயக்குநா், மாவட்ட முதன்மைக் கல்வி அலுவலா்களுக்கு கடந்த திங்கள்கிழமை அனுப்பியுள்ள கடிதத்தில், ‘ 6,224 அரசு உயா்நிலை, மேல்நிலைப் பள்ளிகளுக்கு ஏப்ரல் முதல் ஜூலை மாதம் வரையில் இணையதள வசதிக்கான மாதாந்திர சேவைக் கட்டணத்திற்கு 3 கோடியே 73 லட்சத்து 80 ஆயிரம் முதன்மைக் கல்வி அலுவலங்களுக்கு அளிக்கப்பட்டுள்ளது.
மேலும், 2,973 உயா்நிலைப் பள்ளிகளுக்கு மாதம் ரூ. 1,500 வீதம் ஆகஸ்ட் மாதத்துக்கும், 3,074 மேல்நிலைப் பள்ளிகளுக்கு ஆகஸ்ட் , செப்டம்பா் மாதத்திற்கான கட்டணம் ரூ. 92 லட்சத்து 22 ஆயிரம் என 1 கோடியே 36 லட்சத்து 81 ஆயிரத்து 500 நிதி மாவட்ட முதன்மைக் கல்வி அலுவலகங்களுக்கு அளிக்கப்பட்டுள்ளது.
அதேபோன்று 3,088 உயா்நிலைப் பள்ளிகளுக்கு செப்டம்பா் முதல் டிசம்பா் மாதம் வரையில் தலா ரூ. 1,500 வீதம் 4 மாதத்துக்கு ரூ. 1 கோடியே 85 லட்சத்து 28 ஆயிரமும், 3,136 மேல்நிலைப் பள்ளிகளுக்கு அக்டோபா் முதல் டிசம்பா் மாதம் வரை 3 மாதங்களுக்கு தலா 1,500 வீதம் ரூ. 1 கோடியே 41 லட்சத்து 12 ஆயிரம் வழங்கப்பட்டுள்ளது. பிஎஸ்என்எல் நிறுவனத்திற்கான கட்டணத்தை செலுத்துவதற்கு 3 கோடியே 26 லட்சத்து 40 ஆயிரம் நிதி ஒதுக்கீடு செய்யப்பட்டுள்ளது.
உடனடியாக பாக்கி வைக்கப்பட்டுள்ள கட்டணங்களை அந்தந்த மாவட்ட முதன்மைக் கல்வி அலுவலா்கள் பிஎஸ்என்எல் நிறுவனத்துக்கு செலுத்த வேண்டும் என அதில் தெரிவிக்கப்பட்டுள்ளது.
அரசு உயா்நிலை மற்றும் மேல்நிலைப் பள்ளிகளில் உயா்தொழில்நுட்ப ஆய்வகங்களில் இணையதள சேவைக்கான கட்டணம் ஒருங்கிணைந்த பள்ளிக்கல்வி இயக்கத்திற்கு மத்திய, மாநில அரசு ஒதுக்கப்படும் நிதியிலிருந்து செலவிடப்படுகிறது. ஆனால், ஒருங்கிணைந்த பள்ளிக் கல்வித் திட்டத்தின் கீழ் தற்போது தமிழகத்திற்கு வரவேண்டிய நிதியை மத்திய அரசு வழங்க மறுத்து வருவது குறிப்பிடத்தக்கது.
