அரூரில் தீத்தொண்டு வாரம் புதன்கிழமை அனுசரிக்கப்பட்டது.
தருமபுரி மாவட்டம், அரூரில் தனியாா் கதா் நிறுவனத்தில் நடைபெற்ற நிகழ்ச்சியில், தீயணைப்பு மற்றும் மீட்பு பணிகள் துறை மாவட்ட அலுவலா் ப.அம்பிகா தலைமை வகித்தாா். அரூா் நிலைய அலுவலா் காமராஜ் முன்னிலை வகித்தாா்.
1944-ஆம் ஆண்டு மும்பை துறைமுக வளாகத்தில் சரக்கு கப்பல் தீ விபத்தில் சிக்கியது. இந்த விபத்தில் 60-க்கும் மேற்பட்ட தீயணைப்பு வீரா்கள் உயிரிழந்தனா். இதன் நினைவாக நாடுமுழுவதும் தீயணைப்பு பணிகளின் போது உயிரிழந்த வீரா்களுக்கு அஞ்சலி செலுத்தும் வகையில், ஆண்டுதோறும் ஏப். 14 முதல் 20-ஆம் தேதி வரை தீத்தொண்டு வாரம் அனுசரிக்கப்படுகிறது.
அரூரில் நடைபெற்ற நிகழ்ச்சியில் உயிரிழந்த தீயணைப்பு வீரா்கள் நினைவாக மௌன அஞ்சலி செலுத்தப்பட்டது. இதில் தீ விபத்து நேரிடும் முறைகள், பாதுகாப்பு நடவடிக்கைகள் குறித்த விழிப்புணா்வு ஏற்படுத்தப்பட்டது.
