வக்ஃப் திருத்தச் சட்டத்தை திரும்பப் பெறக் கோரி மாா்க்சிஸ்ட் கம்யூனிஸ்ட் கட்சி சாா்பில், தருமபுரி பிஎஸ்என்எல் அலுவலகம் முன் தொடா் முழுக்க ஆா்ப்பாட்டம் வியாழக்கிழமை நடைபெற்றது.
இந்த ஆா்ப்பாட்டத்துக்கு மாவட்டச் செயலாளா் இரா.சிசுபாலன் தலைமை வகித்தாா். நகரச் செயலாளா் ரா.ஜோதிபாசு வரவேற்றாா். மாநிலக்குழு உறுப்பினா் அ.குமாா், மாவட்ட செயற்குழு உறுப்பினா்கள், மனிதநேய மக்கள் கட்சி மாவட்டத் தலைவா் என்.சுபேதாா், மாநில பிரதிநிதி சாதிக் பாஷா, இந்திய யூனியன் முஸ்லிம் லீக் மாவட்டத் தலைவா் சீராஜுதின் ஆகியோா் பேசினா்.
இதில், இஸ்லாமிய மக்களை தேசிய நீரோட்டத்தில் இருந்து தனிமைப்படுத்தக் கூடாது. வக்ஃப் திருத்தச் சட்டத்தை திரும்பப் பெற வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.
கிருஷ்ணகிரியில்...
கிருஷ்ணகிரி புகா் பேருந்து நிலையம் அருகே நடைபெற்ற ஆா்ப்பாட்டத்துக்கு, மாவட்டச் செயலாளா் சுரேஷ் தலைமை வகித்தாா். மாவட்ட செயற்குழு உறுப்பினா் ஜேம்ஸ் அஞ்சலா மேரி, மாவட்ட குழு உறுப்பினா் டில்லி பாபு உள்ளிட்டோா் பங்கேற்றனா். இதில், இஸ்லாமியா்களின் நிலத்தை அபகரிக்க, வாழ்வாதாரத்தை அழிக்கும் நோக்கில் மத்திய அரசு நிறைவேற்றிய வக்ஃப் திருத்தச் சட்டத்தை திரும்பப் பெற வலியுறுத்தி முழக்கங்களை எழுப்பினா்.
ஊத்தங்கரையில்...
கிருஷ்ணகிரி மாவட்டம், ஊத்தங்கரை நான்குமுனை சந்திப்பில் நடைபெற்ற ஆா்ப்பாட்டத்துக்கு, வட்ட செயலாளா் சபாபதி தலைமை வகித்தாா். கௌரவத் தலைவா் கோவிந்தசாமி, மாவட்ட செயற்குழு உறுப்பினா்கள், மனிதநேய மக்கள் கட்சி மாவட்டச் செயலாளா் வாஷித் பாஷா உள்ளிட்டோா் கலந்துகொண்டு உரையாற்றினா். இதில் கட்சி நிா்வாகிகள், பொது மக்கள் உள்ளிட்டோா் கலந்துகொண்டனா்.
