அறநிலைய துறையின் சட்டப்படியே பள்ளிகள், கல்லூரிகள் தொடக்கம்: அமைச்சா் பி.கே. சேகா்பாபு

இந்து சமய அறநிலையத் துறையின் சட்டத்தின்படியே அந்தத் துறையின் கீழ் பள்ளிகள், கல்லூரிகள் தொடங்கப்பட்டு நடத்தப்பட்டு வருகின்றன என அமைச்சா் பி.கே. சேகா்பாபு தெரிவித்தாா்.

சென்னை புளியந்தோப்பு பகுதியில் ‘அன்னம் தரும் அமுத கரங்கள்’ நிகழ்ச்சியை வியாழக்கிழமை தொடங்கி வைத்து அமைச்சா் சேகா்பாபு பேசியதாவது:

இந்து சமய அறநிலையத் துறை திருக்கோயில்கள் சாா்பில் நடத்தப்பட்டு வரும் 25 பள்ளிகள், ஒரு பாலிடெக்னிக் கல்லூரி, 9 கலை மற்றும் அறிவியல் கல்லூரிகளில் 22,450 மாணவ, மாணவிகள் கல்வி பயின்று வருகின்றனா். இந்த ஆட்சி அமைந்த பிறகு இந்தப் பள்ளிகள், கல்லூரிகளுக்கு ரூ.152 கோடியில் கூடுதல் வகுப்பறைகள், ஆய்வகங்கள், நூலகங்கள், கலையரங்கங்களை அமைத்து தந்திருக்கிறோம்.

இந்து சமய அறநிலையத் துறை திருக்கோயில்கள் சாா்பில் 10 கல்லூரிகள் திறக்கப்படும் என்று அறிவித்துள்ளோம். அதில், பல்வேறு வழக்குகள் மற்றும் தடைகளைமீறி நீதிமன்றத்தின் நீண்ட போராட்டத்துக்குப் பிறகு 4 கல்லூரிகள் தொடங்கப்பட்டுள்ளன. அந்த 4 கல்லூரிகளிலும் வறுமைகோட்டுக்கு கீழே வாழும் குடும்பங்களைச் சோ்ந்த 2,500 மாணவா்கள் பயன் பெற்று வருகின்றனா்.

1960-ஆம் ஆண்டு மத்திய அரசால் அன்றைய சென்னை மாகாண அட்வகேட் ஜெனரல் சி.பி. ராமசாமி தலைமையில் ஓய்வு பெற்ற அலகாபாத், மும்பை உயா்நீதிமன்ற நீதிபதிகள், பாட்னா அட்வகேட் ஜெனரல் போன்றவா்களைக் கொண்டு இந்து சமய அற கொடைகள் கமிஷன் அமைக்கப்பட்டது. அந்தக் குழு இந்தியா முழுவதும் சுற்றுப்பயணம் மேற்கொண்டு அளித்த அறிக்கையில், இந்து சமய அறநிலையத் துறையின் மூலம் கல்வி நிலையங்களை தோற்றுவிக்க வேண்டும் என பரிந்துரைத்தனா்.

சோழா் காலத்திலேயே... சோழா் காலத்திலே கூட மிகப்பெரிய கல்விச்சாலைகள் இருந்ததாகவும், அதில் 11 பாடப் பிரிவுகள் இடம் பெற்றிருந்ததாகவும், அரக்கோணம் அருகில் உள்ள வீரராஜேந்திரன் காலத்தில் திருமுக்கூடல் திருக்கோயில் வளாகத்தில் கல்விச்சாலையும் மருத்துவச் சாலையும் ஒருசேர இயங்கி வந்திருக்கின்றன என திருக்கோயில் கல்வெட்டுகள் கூறுகின்றன. இப்படி வரலாற்றில் ஆயிரம் ஆண்டுகளுக்கு முன்பே கல்வி நிலையங்களையும் மருத்துவ நிலையங்களையும் மன்னா் காலத்திலேயே தோற்றுவிக்கப்பட்டு இருந்தது என்பதற்கு இதுபோன்ற பல சான்றுகள் இருக்கின்றன.

இந்து சமய அறநிலைத்துறை கொடைகள் சட்டம் பிரிவு 36-இன் படியும், பிரிவு 66(ஐ) (எஃப்) படியும் பள்ளிகள் கல்லூரிகள் மற்றும் பல்கலைக்கழகங்களை தொடங்கலாம். இதில் தத்துவம், கோயில் கட்டடக்கலை போன்ற பாடங்களுடன் கூடிய பட்டப் படிப்புகளை தொடங்குவதற்கு சட்டம் அனுமதி அளிக்கிறது. அந்த வகையில்தான் இந்த ஆட்சி ஏற்பட்ட பிறகு 4 புதிய கல்லூரிகளை முதல்வா் மு.க.ஸ்டாலின் தொடங்கினாா். இதேபோன்று ஆந்திர மாநிலத்தில் திருமலை திருப்பதி தேவஸ்தானம் 7 கல்லூரிகள், 4 பள்ளிகளை நடத்தி வருகிறது. கேரள மாநிலம் குருவாயூா் திருக்கோயில் நிதியின் மூலம் 3 கல்வி நிறுவனங்கள் நடத்தப்பட்டு வருகின்றன.

எம்ஜிஆா், ஜெயலலிதா ஆட்சியிலும்... எதிா்க்கட்சித் தலைவா் மற்றும் முன்னாள் முதல்வா் ஜெயலலிதா ஆகியோா் கடந்த 2015 முதல் 2018- ஆம் ஆண்டுகளில் அருள்மிகு பழனி ஆண்டவா் தொழில்நுட்ப கல்லூரி, அருள்மிகு பழனி ஆண்டவா் மகளிா் கலைக் கல்லூரி, அருள்மிகு பழனி ஆண்டவா் கலை மற்றும் பண்பாடு கல்லூரி, குற்றாலம் பராசக்தி கல்லூரி, கன்னியாகுமரி அருள்மிகு தேவி குமாரி அம்மன் கல்லூரி ஆகிய இந்து சமய அறநிலையத்துறை கல்லூரிகளில் ரூ.28.64 கோடி செலவில் கட்டப்பட்ட கூடுதல் கட்டங்களையும் திறந்து வைத்துள்ளனா்.

சி.பி. ராமசாமி தலைமையில் அமைக்கப்பட்ட இந்து சமய அறக் கொடைகள் கமிஷன் பரிந்துரையின்படி, முன்னாள் முதல்வா்கள் காமராஜா், பக்தவத்சலம், கருணாநிதி, எம்ஜிஆா் போன்றவா்களால் பள்ளி, கல்லூரிகள் தொடங்கப்பட்டுள்ளன என்றாா் அவா்.

பெட்டிச் செய்தி...

திருச்செந்தூா் கோயில் திருப்பணி

எடப்பாடி கே.பழனிசாமி ஆட்சிக் காலத்தில் ஹெச்சிஎல் நிறுவனம் ரூ. 200 கோடியில் திருச்செந்தூரில் திருப்பணிகளைத் தொடங்க வேண்டும் என்று அனுமதி கேட்டனா். அனுமதி வழங்க வேண்டுமெனில், அந்தப் பணிகளை பொதுப்பணித்துறையின் சாா்பில்தான்

மேற்கொள்வோம் என்று கூறியுள்ளனா். அதற்கு ஹெச்சிஎல் நிறுவனம் உடன்படவில்லை. திமுக ஆட்சி வந்த பிறகுதான் ஹெச்சிஎல் நிறுவனத்துக்கு திருச்செந்தூா் திருக்கோயில் திருப்பணிகள் மேற்கொள்ள உடனடியாக அனுமதி அளிக்கப்பட்டது என்றாா் அமைச்சா் சேகா்பாபு.