இளைஞா்களுக்கு சுய வேலைவாய்ப்பு பயிற்சி

கடலூா் மாவட்ட இளைஞா்களுக்கு ஊரக சுய வேலைவாய்ப்புப் பயிற்சி நிறுவனம் மூலம் சுய வேலைவாய்ப்புப் பயிற்சி அளிக்கப்பட உள்ளதாக ஆட்சியா் சிபி ஆதித்யா செந்தில்குமாா் தெரிவித்தாா்.

இதுகுறித்து அவா் வெள்ளிக்கிழமை வெளியிட்ட செய்திக்குறிப்பு: கிராமப்புற இளைஞா்களின் சுய வேலைவாய்ப்புக்காக ஒவ்வொரு மாவட்டத்திலும் ஊரக சுய வேலைவாய்ப்பு பயிற்சி நிறுவனங்கள் செயல்பட்டு வருகின்றன.

தமிழ்நாட்டில் சென்னை தவிர 37 மாவட்டங்களில் பயிற்சி மையங்கள் செயல்படுகின்றன. அரியலூா், தூத்துக்குடி, திண்டுக்கல், தேனி, புதுக்கோட்டை, சிவகங்கை, ஈரோடு மற்றும் திருப்பூா் ஆகிய 8 மாவட்டங்களில் மட்டும் உண்டு உறைவிட வசதியுடன் பயிற்சிகள் அளிக்கப்படுகின்றன.

இந்தப் பயிற்சி மையங்களில் கைப்பேசி பழுது நீக்குதல், வீட்டு உபயோகப் பொருள்கள் பழுது நீக்குதல், கான்கிரீட் கொத்தனாா், பிளம்பிங், தச்சு, இரு சக்கர வாகன பழுது நீக்குதல் உள்ளிட்ட 64 வகையான சுய வேலைவாய்ப்பு பயிற்சிகள் கட்டணமின்றி 18 முதல் 45 வயதுக்குள்பட்ட கிராமப்புற இளைஞா்களுக்கு வழங்கப்படுகிறது.

8-ஆம் வகுப்பு குறைந்தபட்ச கல்வித்தகுதி. 8-ஆம் வகுப்புக்கு மேல் ஐடிஐ, டிப்ளமோ, பட்டப்படிப்பு படித்தவா்களுக்கு கல்வித்தகுதிக்கு ஏற்ற பயிற்சிகள் வழங்கப்படும்.

உணவு, தேநீா் இலவசமாகவும், பயிற்சி பெறுவோருக்கு சீருடை, பாடப்பொருள்கள், தொழில்முனைவோராக மாறுவதற்குரிய அடிப்படை தொழில் கருவிகளும் வழங்கப்படும்.

ஒவ்வோா் ஆண்டும் நடத்தப்படும் பல்வேறு பயிற்சிகளுக்கான கால அட்டவணை ஊரக சுய வேலைவாய்ப்பு பயிற்சி நிறுவனத்தில் பட்டியலிடப்பட்டுள்ளது. இதனடிப்படையில் கிராமப்புற இளைஞா்கள் தங்களுக்கு ஏற்ற தொழில் பயிற்சிகளில் சோ்ந்து பயன் பெற விரும்பினால், இயக்குநா், ஊரக சுய வேலைவாய்ப்பு பயிற்சி நிறுவனம், 68, சங்கர நாயுடு தெரு, தானம் நகா், எஸ்.ஆா். பெட்ரோல் பங்க் அருகில், திருப்பாதிரிப்புலியூா், கடலூா் - 607 002, தொலைபேசி எண் 04142-796183 மற்றும் திட்ட இயக்குநா், தமிழ்நாடு மாவட்ட ஊரக வாழ்வாதார இயக்க அலுவலகம், மாவட்ட இயக்க மேலாண்மை அலகு, பூமாலை வணிக வளாகம், ஜி.எச்.சாலை, கடலூா் - 607 002 தொலைபேசி எண் 9444094261 ஆகியவற்றில் தொடா்புகொண்டு தகவல் பெறலாம்.

தமிழ்நாடு மகளிா் மேம்பாட்டு நிறுவனத்தின் வாழ்வாதார உதவி அழைப்பு எண் 155330 மற்றும் ஊரக சுய வேலைவாய்ப்பு நிறுவனங்களின் கட்டணமில்லா தொலைபேசி எண் 1800 309 8039 ஆகியவற்றிலும் தொடா்புகொள்ளலாம் எனத் தெரிவித்துள்ளாா்.