ஜோலாா்பேட்டை அருகே கொடுத்த பணத்தை திருப்பி கேட்ட இளைஞா் கொலை செய்யப்பட்டது தொடா்பாக 4 பேரை போலீஸாா் கைது செய்தனா்.
ஜோலாா்பேட்டை அருகே பெரிய மூக்கனூா் கிராமத்தைச் சோ்ந்த வெள்ளியங்கிரி மகன் கோடீஸ்வரன்(27). திருமணமாகாத இவா் சிங்கப்பூரில் பணி புரிந்து வந்தாா். இதற்கிடையே கடந்த ஆண்டு பெரிய மூக்கனுாா் கிராமத்தை சோ்ந்த கோடீஸ்வரனின் நண்பா் மணிக்கு ரூ.2,000-ஐ கடனாக அனுப்பி வைத்தாா். வாங்கிய பணத்தை மணி திருப்பிதரவில்லையாம்.
இந்நிலையில் கடந்த 2 மாதங்களுக்கு முன்பு கோடீஸ்வரன் கைப்பேசியில் மணியிடம் பணத்தை திருப்பி தருமாறு கேட்டதில் தகராறு ஏற்பட்டுள்ளது.
இதற்கிடையே தீபாவளியை முன்னிட்டு விடுமுறையில் கடந்த 10 நாள்களுக்கு முன்பு கோடீஸ்வரன் தனது சொந்த ஊருக்கு வந்திருந்தாா்.
அப்போது கோடீஸ்வரன் தனது உறவினரான வேட்டப்பட்டு சோ்ந்த கிருபாகரனிடம் நான் மணியிடம் பேசுவதில்லை நீ அவனிடம் பேசி வாங்கிய பணத்தை தரும்படி கூற வேண்டும் எனத் தெரிவித்தாா்.
இதனால், சனிக்கிழமை மணியிடம் வாங்கிய பணத்தை திருப்பித் தருமாறு கேட்டுள்ளாா். அதையடுத்து கோடீஸ்வரன் வழியில் சென்றபோது மணிகண்டன், வசந்த் மற்றும் நவீன் ஆகியோா் சோ்ந்து கோட்டீஸ்வரனை தாக்கியுள்ளனா். டில்லி பாபு தான் வைத்திருந்த கத்தியால் கோட்டீஸ்வரனை குத்தியதில் நிகழ்விடத்திலேயே அவா் உயிரிழந்தாா்.
அதையடுத்து ஜோலாா்பேட்டை போலீஸாா் கோடீஸ்வரனை கொலை செய்த வழக்கில் டில்லி பாபு (20), மணிகண்டன் (20),நவீன் (20), மேல் அச்சமங்கலம் சோ்ந்த 17 வயது சிறுவன் உள்ளிட்ட 4 பேரை போலீஸாா் கைது செய்தனா். 17 வயது சிறுவன் வேலூா் காகிதப் பட்டறை சீா்திருத்த பள்ளியில் சோ்த்தனா். மூவரை திருப்பத்தூா் நீதிமன்றத்தில் ஆஜா்படுத்தி சிறையில் அடைத்தனா்.
