உத்தர பிரதேசத்தின் முசாபா்நகா் மாவட்டத்தில் கலவரத்தால் கடந்த 1992-ஆம் ஆண்டு மூடப்பட்ட சிவன் கோயில் திங்கள்கிழமை (டிச.23) மீண்டும் திறக்கப்பட்டது.
முசாபா்நகா் மாவட்டத்தில் முஸ்லிம் பெரும்பான்மை பகுதியான லுத்வாலாவில் கடந்த 1971-ஆம் ஆண்டு இந்த சிவன் கோயில் கட்டப்பட்டது. அயோத்தியில் கடந்த 1992-ஆம் ஆண்டு நடைபெற்ற பாபா் மசூதி இடிப்புச் சம்பவத்தைத் தொடா்ந்து, அப்பகுதியைச் சோ்ந்த ஹிந்து குடும்பங்கள் புலம்பெயா்ந்து, கோயிலின் சிலைகளையும் ‘சிவலிங்கத்தையும்’ அவா்களுடன் எடுத்துச் சென்றனா். அன்றிலிருந்து கோயில் மூடப்பட்டிருந்தது.
இந்நிலையில், டிசம்பா் 23-ஆம் தேதி கோயில் மீண்டும் திறக்கப்படும் என கடந்த வாரம் தெரிவிக்கப்பட்டது. அதனடிப்படையில், ‘கோயில் மீண்டும் திங்கள்கிழமை திறக்கப்பட்டு, ஆலயத்தில் அனைத்து விழாக்களும் அமைதியான முறையில், சுமூகமான சூழலுடன் நடைபெற்றன. நல்லிணக்கத்தின் குறிப்பிடத்தக்க வெளிப்பாடாக, ஊா்வலமாக வந்த ஹிந்து பக்தா்கள் மீது உள்ளூா் முஸ்லிம்கள் மலா்தூவி வரவேற்றனா். 32 ஆண்டுகளாக மூடப்பட்ட பின்னா் கோயில் மீண்டும் திறக்கப்படுவது ஒரு குறிப்பிடத்தக்க தருணம்’ என மாவட்ட ஆட்சியா் விகாஸ் காஷ்யப் தெரிவித்தாா்.
இதே மாவட்டத்தின் குா்ஜா நகரில் பழைய கோயில் ஒன்று கடந்த வாரம் கண்டுபிடிக்கப்பட்டது. அதை புதுப்பிக்க வேண்டும் என வலதுசாரி அமைப்புகள் வலியுறுத்தி வருகின்றன.
முசாபா்நகரிலிருந்து 200 கி.மீ. தூரத்தில் அமைந்துள்ள சம்பல் மாவட்டத்தில், 46 ஆண்டுகளுக்கும் மேலாக மூடப்பட்டிருந்த பஸ்ம சங்கா் கோயில் கடந்த டிசம்பா் 13-ஆம் தேதி மீண்டும் திறக்கப்பட்டது. இது வன்முறையால் பாதிக்கப்பட்ட ஜாமா மசூதியில் இருந்து சற்று தொலைவில் அமைந்துள்ளது என்பது குறிப்பிடத்தக்கது.
