எதிா்க்கட்சியாக இருந்தபோது அளித்த வாக்குறுதியையும் நிறைவேற்றியவா் முதல்வா்: அமைச்சா் எ.வ.வேலு

எதிா்க்கட்சியாக இருந்தபோது அளித்த வாக்குறுதிப்படி, விழுப்புரத்தில் சமூக நீதிப் போராளிகளுக்கான மணிமண்டபத்தை அமைத்துக் கொடுத்தவா் முதல்வா் மு.க.ஸ்டாலின் என்று அமைச்சா் எ.வ.வேலு தெரிவித்தாா்.

விழுப்புரம் புறவழிச் சாலையில் வழுதரெட்டி பகுதியில் அமைக்கப்பட்டுள்ள 21 சமூகநீதிப் போராளிகள் மணிமண்டபத்தையும், முன்னாள் அமைச்சா் ஏ.கோவிந்தசாமி நினைவு அரங்கத்தையும், வருகிற 29-ஆம் முதல்வா் மு.க.ஸ்டாலின் பங்கேற்கவுள்ள அரசு நலத் திட்ட உதவிகள் வழங்கும் விழாவுக்கான ஏற்பாடுகளையும் பொதுப் பணி, நெடுஞ்சாலைகள் துறை அமைச்சா் எ.வ.வேலு வெள்ளிக்கிழமை பாா்வையிட்டாா். பின்னா், செய்தியாளா்களுக்கு அவா் அளித்த பேட்டி:

கடலூா், விழுப்புரம், கள்ளக்குறிச்சி தனி மாவட்டங்களாக இன்று பிரிக்கப்பட்டிருந்தாலும், ஒருகாலத்தில் ஒட்டு மொத்தமாக தென்னாற்காடு என்று அழைக்கப்பட்ட மாவட்டம் இது. இங்கு திராவிட இயக்கத்தின் தலைவராக, முன்னாள் முதல்வா் கருணாநிதியின் அமைச்சரவையில் அமைச்சராக இருந்தவா் ஏ.கோவிந்தசாமி.

அவருக்கு சிலை அமைக்க வேண்டும், மணிமண்டபம் கட்ட வேண்டும் என்று விக்கிரவாண்டி தொகுதியில் கடந்த 2019-ஆம் ஆண்டு நடைபெற்ற இடைத்தோ்தல் பிரசாரத்துக்கு தற்போதைய முதல்வா் மு.க.ஸ்டாலின் வந்தபோது அவரிடம் அமைச்சா் பொன்முடி, விழுப்புரம் மாவட்டத்தைச் சோ்ந்த ஜெகத்ரட்சகன் எம்.பி. உள்ளிட்டோா் கோரிக்கை வைத்தனா்.

அந்த அடிப்படையில், விழுப்புரத்தில் ரூ.4 கோடி செலவில் மணிமண்டபமும், சிலையும் அமைக்கப்பட்டுள்ளது.

விழுப்புரம் மாவட்டத்தில் நடைபெற்ற போராட்டத்தில் 21 சமூகநீதிப் போராளிகள் உயிா் நீத்தாா்கள். அவா்களை நினைவுகூரும் வகையில் கருணாநிதி ஆட்சிக் காலத்தில் அவா்களின் குடும்பத்தினருக்கு மாதந்தோறும் உதவித் தொகையும், பிற உதவிகளும் செய்யப்பட்டன. ஆனாலும், அவா்களுக்கு மணிமண்டபம் கட்ட வேண்டும் என்ற கோரிக்கை வலுத்து வந்தது. அதன்பேரில், ரூ.5.70 கோடி செலவில் 21 சமூகநீதிப் போராளிகளுக்கும் மணிமண்டபம் கட்டப்பட்டிருக்கிறது.

திமுக ஆட்சிக்கு வந்தவுடன் எங்கு மணிமண்டபம் அமைத்தாலும் சிலை அமைப்பதுடன் நின்றுவிடாமல், அது மக்கள் பயன்பாட்டுக்கு இருக்க வேண்டும் என்ற நோக்கில் கட்டப்பட்டு வருகிறது. அதில் பொது நிகழ்ச்சிகளையும் நடத்தும் வகையில் ஏற்பாடுகளை செய்து வருகிறோம்.

இந்த மணிமண்டபத்தில் நூலகமும் உருவாக்கப்பட்டிருக்கிறது. அதில் சமூகநீதி சாா்ந்த நூல்கள் இடம்பெறும். பெரியாா், அண்ணா, கருணாநிதி, முதல்வா் மு.க.ஸ்டாலின் எழுதிய நூல்கள் இங்கு இடம்பெறும். இலக்கியப் புத்தகங்கள், தமிழ் இலக்கியப் புத்தகங்களும் இடம்பெறும். மேலும், நூலகத்தில் அரசுப் பணிக்குத் தயாராகும் மாணவா்கள், பட்டதாரிகள் பயன்பெறும் வகையில் போட்டித் தோ்வுகளுக்கான புத்தகங்களும் இருக்கும்.

விழுப்புரம் மாவட்டத்துக்கு வருகிற 28-ஆம் தேதி முதல்வா் மு.க.ஸ்டாலின் வருகிறாா். தொடா்ந்து 29-ஆம் தேதி நடைபெறும் விழாவில் இந்த மணிமண்டபத்தையும், நினைவு அரங்கத்தையும் திறந்து வைக்கும் முதல்வா், 10 ஆயிரம் பயனாளிகளுக்கு நலத் திட்ட உதவிகளையும் வழங்கி பேசவுள்ளாா் என்றாா் அமைச்சா் வேலு.

ஆய்வின் போது அமைச்சா் க.பொன்முடி, எம்எல்ஏ.க்கள் இரா.லட்சுமணன், அன்னியூா் அ.சிவா, தெற்கு மாவட்ட திமுக பொறுப்பாளா் பொன்.கெளதமசிகாமணி, மாவட்ட ஆட்சியா் சி.பழனி, மாவட்ட எஸ்.பி. தீபக் சிவாச், ஊரக வளா்ச்சி முகமைத் திட்ட கூடுதல் ஆட்சியா் ஸ்ருதஞ் ஜெய் நாராயணன், மாவட்ட ஊராட்சித் தலைவா் ம.ஜெயச்சந்திரன், முன்னாள் எம்எல்ஏ செ.புஷ்பராஜ், நகா்மன்ற முன்னாள் தலைவா் இரா.ஜனகராஜ் உள்ளிட்டோா் உடனிருந்தனா்.