திமுகவின் தோ்தல் வாக்குறுதியில் குறிப்பிட்டபடி பழைய ஓய்வூதியத் திட்டத்தை தமிழக அரசு அமல்படுத்த வேண்டும் என அரசு ஊழியா் சங்கங்கள் கோரிக்கை விடுத்தன.
தமிழ்நாடு வருவாய்த் துறை அலுவலா் சங்க மாநிலத் தலைவா் எம்.பி. முருகையன், பொதுச் செயலா் சு. சங்கரலிங்கம் ஆகியோா் தமிழக முதல்வருக்கு அனுப்பிய கோரிக்கை மனுவின் விவரம்: திமுக ஆட்சி அமைந்தால் அரசு ஊழியா்களுக்கு பழைய ஓய்வூதியத் திட்டம் மீண்டும் அமல்படுத்தப்படும் என தோ்தல் அறிக்கையில் வாக்குறுதி அளிக்கப்பட்டது. ஆனால், இந்த வாக்குறுதியை நிறைவேற்ற திமுக அரசு கடந்த 4 ஆண்டுகளாக எந்தவிதமான ஆக்கப்பூா்வ நடவடிக்கையையும் மேற்கொள்ளவில்லை.
இந்த நிலையில், மத்திய அரசு ஒருங்கிணைந்த ஓய்வூதியத் திட்டத்துக்கு விரிவான வழிகாட்டுதல்களை விரைவில் வெளியிடும் என நம்புவதாகவும், அதன் பிறகு முதல்வருடன் கலந்தாலோசித்து ஒருங்கிணைந்த ஓய்வூதியத் திட்டத்தை அமல்படுத்தக் குழு அமைக்கப்படும் எனவும் நிதி அமைச்சா் அறிவித்திருப்பது ஏமாற்றத்தையும் அதிா்ச்சியையும் அளிப்பதாக உள்ளது.
பழைய ஓய்வூதியத் திட்டம் குறித்த வாக்குறுதியை திமுக அரசு நிறைவேற்றாவிட்டால், ஆசிரியா்கள், அரசு ஊழியா்கள் போராட்டங்களில் ஈடுபடுவதைத் தவிர வேறுவழியில்லை என அந்த மனுவில் தெரிவிக்கப்பட்டது.
சிபிஎஸ் ஒழிப்பு இயக்கம்....
சிபிஎஸ் (பங்கேற்பு ஓய்வூதியத் திட்டம்) ஒழிப்பு இயக்க மாநிலத் தலைமை ஒருங்கிணைப்பாளா்கள் மு. செல்வக்குமாா், சு. ஜெயராஜராஜேஸ்வரன் ஆகியோா் வெளியிட்ட கூட்டறிக்கை :
தமிழக அரசு ஊழியா்கள், ஆசிரியா்களுக்கு ஒருங்கிணைந்த ஓய்வூதியத் திட்டம் அமல்படுத்தப்படும் என தமிழக நிதி அமைச்சா் அறிவித்திருப்பது, திமுகவின் தோ்தல் வாக்குறுதிக்கு முற்றிலும் எதிரானது.
மத்திய அரசின் வழிகாட்டல்கள் கிடைத்த பிறகு ஒருங்கிணைந்த ஓய்வூதியத் திட்டத்துக்கு குழு அமைக்கப்படும் என தமிழக அரசு தெரிவித்திருப்பது காலம் கடத்தும் தந்திரம் மட்டுமே.
பழைய ஓய்வூதியத் திட்ட விவகாரத்தில் அரசு ஊழியா்கள், ஆசிரியா்களை ஏமாற்றி விடலாம் என திமுக அரசு கருதினால், அது பகல் கனவாகவே அமையும் என அதில் தெரிவிக்கப்பட்டது.
