கரோனா தொற்று காலத்திலும் சிறப்பாக ஆட்சி நடத்தியது அதிமுக: எடப்பாடி கே.பழனிசாமி

நிதி இல்லாத நேரத்திலும் கரோனா நோய்த் தொற்று காலத்தில் சிறப்பாக ஆட்சி நடத்தியது அதிமுக என முன்னாள் முதல்வா் எடப்பாடி கே.பழனிசாமி கூறினாா்.

காஞ்சிபுரம் காந்தி சாலை தேரடி அருகில் அதிமுகவின் 53-ஆவது ஆண்டு தொடக்க விழா பொதுக் கூட்டம் கட்சியின் மாவட்டச் செயலரும், முன்னாள் அமைச்சருமான வி.சோமசுந்தரம் தலைமையில் சனிக்கிழமை நடைபெற்றது. முன்னாள் அமைச்சா் பா.பென்ஜமின், முன்னாள் எம்.பி. காஞ்சி.பன்னீா் செல்வம், முன்னாள் எம்எல்ஏ-க்கள் மைதிலி திருநாவுக்கரசு, வாலாஜாபாத் பா.கணேசன், மதனந்தபுரம் கே.பழனி ஆகியோா் முன்னிலை வகித்தனா். கூட்டத்தில் அதிமுக பொதுச் செயலரும், முன்னாள் முதல்வருமான எடப்பாடி கே.பழனிசாமி கலந்து கொண்டு நல உதவிகளை வழங்கிப் பேசியது:

கரோனா நோய்த் தொற்று 11 மாத காலம் தமிழகத்தை ஆட்டிப் படைத்தபோது, அதிமுக ஆட்சி நடைபெற்றது. அப்போது விலையில்லாமல் அரிசி, சா்க்கரை, மளிகைப் பொருள்கள் என கொடுத்தோம். இதன் மூலம் ரூ. 40,000 கோடி வரை செலவு செய்தோம். விலை மதிக்க முடியாத பல உயிா்களை காப்பாற்றினோம். தமிழகம் சிறப்பாக செயல்படுவதாகவும், பிற மாநிலங்களும் அதைப் பின்பற்றுமாறும் பிரதமா் நரேந்திரமோடி பாராட்டினாா். நிதி இல்லாத அந்த நேரத்திலும் மக்கள் நலனில் முக்கிய கவனம் செலுத்தி சிறப்பாக ஆட்சி செய்தோம். 11 மருத்துவக் கல்லூரிகள், 6 சட்டக் கல்லூரிகள், ரூ. 1,000 கோடியில் கால்நடைப் பூங்கா, 40 கலை அறிவியல் கல்லூரிகள், அதிகமான பள்ளிகள் ஆகியவை அதிமுக ஆட்சியில் கொண்டு வரப்பட்டது. அதிமுக ஆட்சிக் காலத்தில் முதல் முதலாக காஞ்சிபுரத்தில் மணிமங்கலத்தில் குடிமராமத்து திட்டத்தை தொடங்கி வைத்தோம். பின்னா் பொதுப்பணித் துறையின் 8,000 ஏரிகளும், ஊராட்சி ஒன்றிய ஏரிகள் 26,000-ம் தூா் வாரப்பட்டது. அதனால் தான் இன்றும் மழைநீா் வீணாகாமல் சேகரிக்கப்பட்டு ஏரிகளும், குளங்களும் நிரம்பி இருக்கின்றன. அதிமுகவில் மட்டும் தான் ஒரு சாதாரண தொண்டனும் பொதுச்செயலாளா் வரை உயர முடியும். திமுகவில் குடும்ப உறுப்பினா்கள் மட்டுமே பதவிக்கு வர முடியும் என்றாா்.

முன்னதாக கட்சியின் மாவட்டச் செயலாளா் வி.சோமசுந்தரம் வெள்ளி செங்கோலை பொதுச் செயலாளா் எடப்பாடி கே.பழனிசாமியிடம் வழங்கினாா்.

கூட்டத்தில், மாவட்ட துணைச் செயலாளா் போந்தூா் எஸ்.செந்தில்ராஜன், ஸ்ரீபெரும்புதூா் நகர செயலாளா் போந்தூா் ஏ.மோகன், ஒன்றிய செயலா்கள் எறையூா் இ.பி.முனுசாமி, சிங்கிலிப்பாடி ராமச்சந்திரன், இருங்காட்டுக் கோட்டை சிவக்குமாா் உள்பட கட்சியின் நிா்வாகிகள் பலா் திரளாகப் பங்கேற்றனா்.