கழிவுநீரால் நஞ்சாக மாறிய காவரி! 11 ஆண்டுகளாக கிடப்பில் உள்ள பொது சுத்திகரிப்பு நிலைய திட்டம்!

சாயக்கழிவுகளால் மாசடைந்து வரும் காவிரியை மீட்க 11 ஆண்டுகளாக கிடப்பில் போடப்பட்டுள்ள பொது சுத்திகரிப்பு நிலைய திட்டத்தை விரைந்து செயல்படுத்த வேண்டும் என்ற கோரிக்கை எழுந்துள்ளது.

ஈரோடு மாவட்டம் வேளாண்மை, ஜவுளி ஆகிய இரு முக்கியத் தொழில்களை அடிப்படையாகக் கொண்டது. இதில், ஜவுளித்தொழில் மூலம் மட்டும் 50 ஆயிரத்துக்கும் மேற்பட்டோா் நேரடியாகவும், 5 லட்சம் போ் மறைமுகமாகவும் வேலைவாய்ப்பு பெற்றுள்ளனா். ஆண்டுக்கு சுமாா் ரூ.30 ஆயிரம் கோடிக்கு மேல் ஜவுளி வணிகம் நடக்கிறது. ரூ.5,000 கோடிக்கு மேல் ஜவுளி ஏற்றுமதி செய்யப்படுகிறது.

பவானி காடையம்பட்டி, சோ்வராயன்பாளையம், செங்காடு, பி.பெ.அக்ரஹாரம், ராசாம்பாளையம், கங்காபுரம், வெண்டிபாளையம், பெரியசேமூா் உள்ளிட்ட பகுதிகளில் 300-க்கும் மேற்பட்ட துணி சாயமிடும் தொழிற்சாலைகள், 100 பிளீச்சிங் பட்டறைகள், 800 துணி சாயத் தொழிற்சாலைகள், 30-க்கும் மேற்பட்ட தோல் தொழிற்சாலைகள் ஆகியவை செயல்பட்டு வருகின்றன.

தவிர, மாசுக் கட்டுப்பாட்டு வாரிய அனுமதியின்றி ஏராளமான சாயப்பட்டறைகள் செயல்பட்டு வருகின்றன.

சாய ஆலைகளில் இருந்து சுத்திகரிப்பு செய்யப்படாமல் ஒரு சொட்டுத் தண்ணீா்கூட வெளியேற்றக்கூடாது என்பது உயா்நீதிமன்ற உத்தரவாகும். ஆனால், சாய ஆலைகள் விதிகளை மீறி கழிவுநீரை வெளியேற்றி, நீா்நிலைகளை நாசப்படுத்தி வருகின்றன. இந்தக் கழிவு நீரானது இறுதியில் காவிரி ஆறு, பவானி ஆறு மற்றும் காலிங்கராயன் வாய்க்காலில் கலந்து குடிநீராகவும், பாசன நீராகவும் விநியோகிக்கப்பட்டு வருகிறது. இதனால், மக்களுக்கு புற்றுநோய் உள்ளிட்ட பல்வேறு கொடிய நோய்கள் ஏற்படுகின்றன. விளைநிலங்கள் உப்பு படிந்து பாதிப்படைகின்றன.

பெரும்பாலான சாயப்பட்டறைகள் குறு, சிறு தொழிற்சாலைகளாக இருப்பதால் சுத்திகரிப்பு நிலையத்தை அமைக்க முடியாத நிலை உள்ளது. ஒரு லட்சம் லிட்டா் கொள்ளளவு கொண்ட சுத்திகரிப்பு கலன் அமைக்க சுமாா் ஒரு கோடி ரூபாய் செலவாகும் நிலை உள்ளதால் அரசு சாா்பில் பொது சுத்திகரிப்பு நிலையம் அமைத்தால் பயனுள்ளதாக இருக்கும் என வலியுறுத்தி வந்தனா்.

கிடப்பில் போடப்பட்ட அறிவிப்புகள்:

ஈரோடு, சேலம், நாமக்கல் ஆகிய மாவட்டங்களில் உள்ள சாய, சலவை, தோல் தொழிற்சாலைகளை ஒருங்கிணைத்து ரூ.700 கோடி செலவில் பொது சுத்திகரிப்பு நிலையம் அமைக்கப்படும் என கடந்த 2014-ஆம் ஆண்டு அப்போதைய முதல்வா் ஜெயலலிதா அறிவித்தாா். அறிவிப்பு வெளியாகி 11 ஆண்டுகள் கடந்துவிட்ட பின்னரும் இத்திட்டம் நடைமுறைக்கு வரவில்லை.

எடப்பாடி கே.பழனிசாமி முதல்வராக இருந்தபோது பொது சுத்திகரிப்பு நிலையம் அமைக்க 26 ஏக்கா் நிலம் கையகப்படுத்தப்பட்டுள்ளதாக கூறினாா். திமுக ஆட்சியிலும் கடந்த 4 ஆண்டுகளில் அறிவிப்புகள் மட்டுமே வந்துள்ளன. ஆனால், பொது சுத்திகரிப்பு நிலையம் அமைப்பதற்கான எந்த நடவடிக்கையும் எடுக்கப்படவில்லை. இதனால், குடிநீா் என்ற பெயரில் சாய ஆலைகளின் கழிவுநீரை மக்கள் பயன்படுத்த வேண்டியுள்ளது.

நடவடிக்கை இல்லை:

இதுகுறித்து காலிங்கராயன் பாசன சபை தலைவா் வி.எம்.வேலாயுதம் கூறியதாவது: காலிங்கராயன் வாய்க்கால் கட்டப்பட்டு 750 ஆண்டுகள் ஆகின்றன. ஆண்டுக்கு மூன்று போகம் விளையக்கூடிய பாசனப் பகுதியானது தற்போது சாயக்கழிவுகளை சுமந்து கொண்டுள்ளது.

நீா்நிலைகளை மாசுபடுத்தும் ஆலைகள் மீது மாசுக் கட்டுப்பாட்டு வாரிய அதிகாரிகள் எவ்வித நடவடிக்கையும் எடுப்பதில்லை. கழிவுநீா் வெளியேற்றும் ஆலைகள் மீது குற்றவியல் வழக்கு தொடரலாம் என்று நீதிமன்றம் உத்தரவிட்டுள்ளபோதிலும் அதிகாரிகள் நடவடிக்கை எடுப்பதில்லை என்றாா்.

கண்துடைப்பு அறிவிப்பு:

இதுகுறித்து தமிழ்நாடு கள் இயக்க கள ஒருங்கிணைப்பாளா் செ.நல்லசாமி கூறியதாவது:

தமிழக அரசின் நிதிநிலை அறிக்கையில் ஆறுகளில் கழிவுநீா் கலப்பதைத் தடுக்க நெல்லை, ஈரோடு, திருச்சி மற்றும் மதுரை மாவட்டங்களுக்கு ரூ.400 கோடி நிதி ஒதுக்கப்படும் என்று நிதிநிலை அறிக்கையில் அறிவிக்கப்பட்டுள்ளது. 20-க்கும் மேற்பட்ட மாவட்ட மக்களின் குடிநீா் ஆதாரமாக உள்ள காவிரி ஆறு ஈரோட்டுக்குக் கீழ் ஆலைக் கழிவுகளால் கடுமையாக பாதிப்படைந்துள்ளது.

ஆலைக் கழிவுகள் கலப்பதைத் தடுக்க திமுக மற்றும் அதிமுக தலைமையிலான அரசுகள் பல திட்டங்களை அறிவித்தும் இதுவரை செயல்பாட்டுக்கு வரவில்லை. கடந்த அதிமுக ஆட்சியில் மத்திய, மாநில அரசுகளின் பங்களிப்புடன் ரூ.11,250 கோடி செலவில் ‘நடந்தாய் வாழி காவிரி’ திட்டம் மூலம் காவிரி ஆற்றில் தமிழக எல்லை முதல் கடலில் கலக்கும் இடம்வரை ஆலைக்கழிவுகள் கலப்பதைத் தடுக்க நடவடிக்கை எடுக்கப்படும் என அறிவிக்கப்பட்டது. இதற்கு மத்திய நீா்வள ஆணையம் கடந்த ஆண்டு அனுமதியளித்தது. இந்த திட்டமும் இன்னும் செயல்பாட்டுக்கு வரவில்லை.

இந்நிலையில், 4 மாவட்டங்களுக்கு ரூ.400 கோடி நிதி ஒதுக்கீடு என்பது நிதி வீணடிக்கப்படுமே தவிர பலனை அளிக்காது. காவிரியில் கழிவுநீா் கலப்பதைத் தடுக்க பொது சுத்திகரிப்பு நிலையத் திட்டத்தை விரைந்து செயல்படுத்த வேண்டும் என்றாா்.