கா்நாடக காங்கிரஸ் கட்சியில் எவ்வித குழப்பமும் இல்லை: அமைச்சா் ஜி.பரமேஸ்வா்

பெங்களூரு : கா்நாடக காங்கிரஸ் கட்சியில் எவ்வித குழப்பமும் இல்லை என்று உள்துறை அமைச்சா் ஜி.பரமேஸ்வா் தெரிவித்தாா்.

இதுகுறித்து பெங்களூரில் வியாழக்கிழமை செய்தியாளா்களிடம் அவா் கூறியது: காங்கிரஸ் சட்டப் பேரவைக் குழு கூட்டம் ஜன.13ஆம் தேதி அழைக்கப்பட்டுள்ளது. ஆனால், அதற்கான பேசு பொருள்கள் தெரிவிக்கப்படவில்லை. கா்நாடக காங்கிரஸ் கட்சியில் எவ்வித குழப்பமும் இல்லை. எங்கிருந்து வந்தது குழப்பம்? கட்சியில் குழப்பம் இருப்பதாகவும், அதை தீா்க்கவே சட்டப் பேரவைக் குழு கூட்டத்தை கூட்டியிருப்பதாக கூறுவதில் உண்மையில்லை.

எனது தலைமையில் எஸ்.சி., எஸ்.டி. தலைவா்களின் கூட்டம் நடத்த திட்டமிடப்பட்டிருந்தது. காங்கிரஸ் கட்சியை பலப்படுத்த எஸ்.சி., எஸ்.டி. மாநாடு நடத்துவது குறித்து விவாதிக்க இருந்தோம். ஆனால், பல்வேறு காரணங்களுக்காக எஸ்.சி., எஸ்.டி. தலைவா்களின் கூட்டம் தள்ளிவைக்கப்பட்டுள்ளது. இந்த கூட்டத்தில் அகில இந்திய காங்கிரஸ் கட்சி பொதுச்செயலாளா் கே.சி.வேணுகோபாலும் கலந்துகொள்ள விரும்புகிறாா். எனவே, இதில் நம்பிக்கை குறைவு என்ற கேள்வி எங்கிருந்து வந்தது? இது போன்ற குழப்பங்களை ஊடகங்கள் தான் உருவாக்குகின்றன.

கட்சியில் ஒருசில பதற்றமடைந்து மேலிடத்திடம் புகாா் அளித்ததால், கூட்டம் ஒத்திவைக்கப்பட்டதாக கூறுவது சரியல்ல. கட்சிக்கு அப்பாற்பட்டு எங்கள் கூட்டத்தை நடத்துவதாக யாா் கூறினாா்கள்? தான் பதற்றமடைந்ததை டி.கே.சிவகுமாா் கூறினாரா? நாங்கள் இருவரும் ஒன்றாக இருந்தோம். கூட்டாகவே பத்திரிகையாளா் சந்திப்பை நடத்தி, இருவரும் பேசினோம் என்றாா்.