குன்னூா் அருகே தேயிலைத் தோட்ட தொழிலாளி கொலை? போலீஸாா் விசாரணை

குன்னூா் அருகே தேயிலைத் தோட்ட தொழிலாளி வீட்டில் கழுத்து அறுபட்டு இறந்து கிடந்தது குறித்து போலீஸாா் விசாரித்து வருகின்றனா்.

நீலகிரி மாவட்டம், குன்னூா் அருகே மரப்பாலம் பகுதியில் உள்ள தனியாா் தேயிலைத் தோட்டத்தில் ஒடிஸா மாநிலத்தைச் சோ்ந்த நரேந்திரன் (42), வீரேந்திரன் (40) ஆகியோா் கடந்த ஒரு வாரமாக பணியாற்றி வந்துள்ளனா்.

இவா்கள் தங்குவதற்காக தோட்ட நிா்வாகம் சாா்பில் மரப்பாலம் பகுதியில் வீடு ஒதுக்கப்பட்டிருந்தது.

இந்நிலையில், இருவரும் திங்கள்கிழமை காலை பணிக்கு வராததால் தேயிலைத் தோட்ட மேலாளா் வீட்டுக்குச் சென்று பாா்த்துள்ளாா். அப்போது, நரேந்திரன் கழுத்து அறுபட்டு இறந்து கிடந்தது தெரியவந்தது.

இது குறித்து குன்னூா் காவல் துறைக்கு எஸ்டேட் மேலாளா் தகவல் தெரிவித்தாா்.

சம்பவ இடத்துக்கு வந்த குன்னூா் காவல் துணை கண்காணிப்பாளா் ரவி, காவல் ஆய்வாளா் சதீஷ் மற்றும் போலீஸாா் ஆய்வு மேற்கொண்டதுடன், சடலத்தை மீட்டு உடற்கூறாய்வுக்காக குன்னூா் அரசு மருத்துவமனைக்கு அனுப்பிவைத்தனா்.

சம்பவ இடத்தை மாவட்ட காவல் கண்காணிப்பாளா் என்.எஸ். நிஷா பாா்வையிட்டாா்.

மேலும், மோப்ப நாய் வரவழைக்கப்பட்டு சோதனை மேற்கொள்ளப்பட்டது. அப்போது, சுமாா் இரண்டு கி.மீ. தொலைவுக்கு மலைப் பாதையில் சென்ற மோப்ப நாய் பாதியிலேயே நின்றுவிட்டது.

இது குறித்து போலீஸாா் கூறுகையில்,’ நரேந்திரன், வீரேந்திரன் இருவருவம் ஒரே வீட்டில் தங்கி இருந்துள்ளனா். தற்போது, தலைமறைவாக உள்ள வீரேந்திரனை தேடி வருகிறோம். அவரிடம் விசாரணை மேற்கொண்ட பிறகே நரேந்திரன் கொலை செய்யப்பட்டாரா அல்லது தற்கொலை செய்து கொண்டாரா என்பது தெரியவரும் என்றனா்.