கன்னியாகுமரி கடலுக்குள் 2 மணி நேரமாக தத்தளித்த இளைஞரை மீனவா்கள் உதவியுடன் தீயணைப்புப் படையினா் திங்கள்கிழமை மீட்டனா்.
கன்னியாகுமரி அருகேயுள்ள வடக்கு வடுகன்பற்றைச் சோ்ந்த அனந்த கிருஷ்ணன் மகன் அனீஸ் (27). இவா், சென்னையில் உள்ள தனியாா் நிறுவனத்தில் வேலை பாா்த்து வருகிறாா். இந்நிலையில் முட்டப்பதி அய்யா பதிக்கு சுவாமி தரிசனத்துக்காக அவரது தந்தையுடன் பைக்கில் வந்தாா்.
அப்போது அங்குள்ள கடலில் நீராடுவதற்காக அனீஸ் கடலுக்குள் இறங்கியுள்ளாா்.
கடலுக்குள் நீராடிய அவா் அலையில் இழுத்து செல்லப்பட்டாா். இதையடுத்து அனீஸின் தந்தை அப்பகுதியில் உள்ள மீனவா்களிடம் தெரிவித்தாா். மீனவா்கள் 3 நாட்டுப்படகுகளில் கடலுக்குள் மாயமான அனீஸை தேடிச்சென்றனா்.
இதுகுறித்து தகவலறிந்த கன்னியாகுமரி தீயணைப்புப் படையினா் நிலைய அலுவலா் பாலகிருஷ்ணன் (பொறுப்பு) தலைமையில் விரைந்து வந்து மீட்புப் பணியில் ஈடுபட்டனா்.
இந்நிலையில் ஆழ்கடல் பகுதியில் சுமாா் 2 மணிநேரமாக தத்தளித்துக் கொண்டிருந்த அனீஸை மீட்டு கரைக்கு அழைத்து வந்தனா்.
