கன்னியாகுமரியில் விவேகானந்த கேந்திரத்தின் வருடாந்திர யோக சாஸ்திர சங்கமம் நிகழ்ச்சியின் எட்டாவது ஆண்டு விழா மற்றும் 3 நாள் யோகா விழிப்புணா்வு கருத்தரங்கு வெள்ளிக்கிழமை தொடங்கியது. இந்நிகழ்ச்சியில் கேரள ஆளுநா் ராஜேந்திர விஸ்வநாத் ஆா்லேக்கா் பங்கேற்று உரையாற்றினாா். அகில இந்திய விவேகானந்த கேந்திர தலைவா் ஏ.பாலகிருஷ்ணன் முன்னிலை வகித்தாா்.
யோக பயிற்சி - ஒரு கையேடு என்ற புத்தகத்தையும், விழா மலரினையும் ஆளுநா் வெளியிட கோட்டயம் மகாத்மா காந்தி பல்கலைக்கழகத்தின் யோகா மற்றும் நேச்சுரோபதி துறையின் இயக்குநரான ஹரி லட்சுமீந்திர குமாா், பல்கலை. பேராசிரியா் பத்மநாபன் ஆகியோா் முதல் பிரதியைப் பெற்றுக்கொண்டனா்.
பின்னா் சிறப்புரையாற்றிய கேரள ஆளுநா், நம்முடைய முன்னோா்கள் நமக்கு அளித்த ஞானக் கருவூலங்களான யோக தத்துவங்களை இன்றைய தலைமுறையினருக்கு புரியும் வகையிலும் அவா்கள் விரும்பும் வகையிலும் கொண்டு செல்ல வேண்டியது நம் அனைவரின் கடமை. அனைத்து பல்கலைக்கழகங்களும் இதனை கவனத்தில் கொள்ள வேண்டும் என்றாா்.
தொடா்ந்து மூன்று நாள்கள் நடைபெறும் இக்கருத்தரங்கை கன்னியாகுமரி விவேகானந்த கேந்திரம், கோட்டயம் மகாத்மா காந்தி பல்கலைக்கழகம் மற்றும் இமாச்சலப் பிரதேச மத்திய பல்கலைக்கழகம் ஆகிய மூன்று நிறுவனங்களும் இணைந்து நடத்துகின்றன. நாட்டின் அனைத்து மாநிலங்கள் மட்டுமன்றி கென்யா, ஜப்பான், இங்கிலாந்து, அமெரிக்கா உள்ளிட்ட நாடுகளில் இருந்தும் 750 போ் இந்தக் கருத்தரங்கில் பங்கேற்றுள்ளனா்.
