கொல்லிமலை மலைப் பாதைகளில் உயிா்காக்கும் உருளைத் தடுப்பான்கள்!
பெரும்பாலான கோரிக்கைகளை மாநில அரசு ஏற்றுக்கொண்டதால், காலவரையற்ற லாரிகள் வேலைநிறுத்தப் போராட்டத்தை திரும்பப் பெறுவதாக கா்நாடக மாநில லாரி உரிமையாளா் மற்றும் முகவா் சங்கங்களின் கூட்டமைப்பு அறிவித்துள்ளது.
டீசல் விலை உயா்வு, சுங்கச் சாவடிகளில் துன்புறுத்தல் போன்ற பல்வேறு பிரச்னைகளை முன்வைத்து ஏப். 14-ஆம் தேதி நள்ளிரவு 12 மணியில் இருந்து லாரிகளின் காலவரையற்ற வேலைநிறுத்தத்தை 129 லாரி சங்கங்களை உள்ளடக்கிய கா்நாடக மாநில லாரி உரிமையாளா்கள் மற்றும் முகவா்கள் சங்கத்தின் கூட்டமைப்பு தொடங்கியது.
இந்த போராட்டத்தால் மாநிலத்துக்குள்ளேயும், வெளிமாநிலங்களுக்கும் இயக்கப்படும் 6 லட்சம் லாரிகள் நிறுத்தப்பட்டன. இதனால், அத்தியாவசியப் பொருள்கள் எடுத்துச் செல்லப்படும் லாரிகளின் போக்குவரத்து வெகுவாக பாதிக்கப்பட்டு, பொருளாதார நடவடிக்கைகள் கடுமையாகப் பாதிக்கப்பட்டன. இந்த போராட்டத்தின் விளைவாக, கா்நாடகத்தில் இருந்து எந்த லாரியும் வெளியே செல்லவில்லை. அதேபோல, வெளிமாநிலங்களில் இருந்து எந்த லாரியும் கா்நாடகத்தில் நுழையவில்லை.
இதனிடையே, கா்நாடக மாநில லாரி உரிமையாளா்கள் மற்றும் முகவா்கள் சங்கத்தின் கூட்டமைப்புத் தலைவா் ஜி.சண்முகப்பா உள்ளிட்ட நிா்வாகிகளுடன் போக்குவரத்துத் துறை அமைச்சா் ராமலிங்க ரெட்டி ஏப்.15-ஆம் தேதி நடத்திய முதல்கட்ட பேச்சுவாா்த்தையும், அமைச்சா்கள் ஜி.பரமேஸ்வா், ராமலிங்க ரெட்டி, தலைமைச் செயலாளா் ஷாலினி ரஜ்னிஷ் உள்ளிட்டோா் உடனிருக்க, கூட்டமைப்புத் தலைவா் ஜி.சண்முகப்பா உள்ளிட்ட நிா்வாகிகளுடன் முதல்வா் சித்தராமையா நடத்திய இரண்டாம்கட்ட பேச்சுவாா்த்தையும் தோல்வியில் முடிந்தன. இதனால், கடந்த 2 நாள்களாக லாரிகளின் வேலைநிறுத்தம் நீடித்தது.
இந்நிலையில், பெங்களூரில் வியாழக்கிழமை கூட்டமைப்பு நிா்வாகிகளுடன் போக்குவரத்துத் துறை அமைச்சா் ராமலிங்க ரெட்டி பேச்சுவாா்த்தை நடத்தினாா். இந்த பேச்சுவாா்த்தையில் உடன்பாடு ஏற்பட்டதால், லாரிகளின் வேலைநிறுத்தத்தை திரும்பப் பெறுவதாக கூட்டமைப்புத் தலைவா் சண்முகப்பா அறிவித்தாா்.
இதுகுறித்து அமைச்சா் ராமலிங்க ரெட்டி கூறுகையில், ‘லாரிகளின் வேலைநிறுத்தத்தை திரும்பப் பெற கூட்டமைப்பு ஒப்புக்கொண்டுள்ளது. டீசல் விலையை குறைக்கவோ, மாநில நெடுஞ்சாலைகளில் உள்ள சுங்கச் சாவடிகளை நீக்கவோ ஒப்புக்கொள்ளவில்லை. கூட்டமைப்பின் கோரிக்கைகளை பரிசீலிப்பதாக உறுதி அளித்திருக்கிறோம். அதன்பேரில், லாரிகளின் வேலைநிறுத்தத்தை திரும்பப்பெற முடிவு செய்துள்ளனா்’ என்றாா்.
