தேனியில் சமரசத் தீா்வு தினத்தை முன்னிட்டு, புதன்கிழமை நடைபெற்ற விழிப்புணா்வுப் பேரணியை தேனி முதன்மை மாவட்ட நீதிபதி ஸ்வா்ணம் ஜெ.நடராஜன் தொடங்கிவைத்தாா்.
தமிழ்நாடு மாநில சமரச மையத்தின் அறிவுறுத்தலின்படி, தேனி மாவட்ட நீதிமன்றம், மாவட்ட சமரச மையம் சாா்பில் சமரசத் தீா்வு தினத்தை முன்னிட்டு, விழிப்புணா்வுப் பேரணி தேனி மாவட்ட நீதிமன்றத்தில் தொடங்கி நடைபெற்றது. பேரணியை தேனி முதன்மை மாவட்ட நீதிபதி ஸ்வா்ணம் ஜெ.நடராஜன் தலைமை வகித்து தொடங்கிவைத்தாா். அப்போது அவா் தெரிவித்தாவது:
தமிழகத்தில் அனைத்து மாவட்ட நீதிமன்றம், வட்டார நீதிமன்ற வளாகங்களில் சமரசத் தீா்வு மையங்கள் செயல்பட்டு வருகின்றன. இந்த மையங்கள் மூலம் பாகப் பிரிவினை, ஜீவனாம்சம், பணம் தொடா்பான வழக்குகள், குடும்ப நல வழக்குகள், தொழில் தகராறு வழக்குகள், காசோலை வழக்குகள் போன்ற வழக்குகளுக்குத் தீா்வு காணமுடியும்.
வழக்குகளுக்கு நடுநிலையான சமரசா் முன்னிலையில் இரு தரப்பினரும் பேச்சுவாா்த்தை நடத்தி தீா்வு காணப்படுகிறது. சமரச மையத்தில் காணப்படும் தீா்வு இறுதியானது, மேல்முறையீடு கிடையாது என்றாா் அவா்.
இதைத் தொடா்ந்து, நடைபெற்ற பேரணியில், நீதிபதிகள், நீதிமன்ற பணியாளா்கள், வழக்குரைஞா்கள், சட்டக்கல்லூரி மாணவா்கள் பங்கேற்றனா். பேரணி தேனி நீதிமன்றத்தில் தொடங்கி தேனி பழைய பேருந்து நிலையம், கொட்டகுடி ஆற்றுப் பாலம் வரை நடைபெற்றது. பேரணியில் தேனி மாவட்ட செய்தி மக்கள் தொடா்பு துறையின் மின்னணு திரை வாகனம் மூலம் சமரசத் தீா்வு தொடா்பான விழிப்புணா்வு குறும்படங்கள் திரையிட்டு காண்பிக்கப்பட்டன.
