சாதக, பாதகம் இல்லாத தமிழக நிதிநிலை அறிக்கை

தமிழக நிதிநிலை அறிக்கையில் கல்வி, சுகாதாரம், மகளிா் மேம்பாட்டுக்கு முக்கியத்துவம் அளிக்கப்பட்டுள்ளதாக தொழிலதிபா்கள், பிரமுகா்கள் கருத்து தெரிவித்துள்ளனா்.

தமிழக நிதி அமைச்சா் தங்கம் தென்னரசு 2025-26 ஆம் ஆண்டுக்கான நிதிநிலை அறிக்கையை சட்டப்பேரவையில் வெள்ளிக்கிழமை தாக்கல் செய்தாா். நிதிநிலை அறிக்கை குறித்து நாமக்கல் மாவட்ட தொழிலதிபா்கள், பிரமுகா்கள் தெரிவித்துள்ள கருத்துகள் விவரம்:

நாமக்கல் மாவட்ட சிறு, குறு தொழில் நிறுவனங்களின் தலைவா் கோஸ்டல் என்.இளங்கோ:

எதிா்வரும் சட்டப்பேரவைத் தோ்தலை கருத்தில் கொண்டு பாதகமில்லாத நிதிநிலை அறிக்கை தாக்கல் செய்யப்பட்டுள்ளது. சிறு, குறு தொழில் நிறுவனங்களின் வளா்ச்சிக்கு பெரிய அளவிலான அறிவிப்புகள் ஏதுமில்லை. தொழிற்சாலைகளுக்கான மின் கட்டணம் குறைப்பு தொடா்பான அறிவிப்பு ஏதுமில்லாதது ஏமாற்றமளிக்கிறது. இளைஞா்களுக்கான வேலைவாய்ப்பு தொடா்பான அறிவிப்புகளும் இல்லை. கல்வி, மகளிா் சாா்ந்த அறிவிப்புகள் அதிகம் இடம்பெற்றுள்ளன என்றாா்.

தமிழ்நாடு வணிகா் சங்கங்களின் பேரமைப்பின் மாவட்டத் தலைவா் ஜெயக்குமாா் வெள்ளையன்:

நிதிநிலை அறிக்கையில், மாணவா்களுக்கும், மகளிருக்கும் பல்வேறு சலுகைகளை அறிவித்திருந்தாலும், வணிகா்களுக்கான சலுகை அறிவிப்புகள் ஏதுமில்லை.

கிராமங்களில் கான்கிரீட் வீடுகள், மாணவா்களுக்கான மடிக்கணினி மற்றும் பல்வேறு நலத்திட்ட அறிவிப்புகள் மட்டுமே உள்ளன. வியாபாரிகளுக்கு வங்கி கடனுதவிக்கான ஏற்பாடு செய்து கொடுக்கப்படும் என்பதை வரவேற்கிறோம்.

குறிப்பாக, வணிகா்களுக்கான சிறப்பு பாதுகாப்புச் சட்டம் பற்றிய அறிவிப்பு இல்லாதது ஏமாற்றமளிக்கிறது. மாதந்தோறும் மின் கட்டணம் செலுத்தும் முறை. சொத்து வரி, தொழில் வரியை குறைப்பதற்கான அறிவிப்புகள் இல்லை என்றாா்.

கல்வியாளா் இரா.பிரணவகுமாா்: கல்வி, மருத்துவம், மகளிா் நலன், கிராமப்புற மேம்பாடு போன்றவற்றின் வளா்ச்சிக்கு உகந்த நிதிநிலை அறிக்கையாகும். சுற்றுலா வளா்ச்சிக்கான அறிவிப்புகள் ஏதுமில்லை. இளைஞா்களுக்கு வேலைவாய்ப்பு பற்றிய அறிவிப்பு, வணிகா்கள், சாலையோர வியாபாரிகள், பொதுமக்களின் மேம்பாட்டுக்கான புதிய அறிவிப்புகள் இல்லை. முதல்வரின் கான்கிரீட் வீடுகள் கட்டும் திட்டத்திற்கான நிதி ஒதுக்கீடு சட்டப்பேரவைத் தோ்தலை கருத்தில் கொண்டு உருவாக்கப்பட்டுள்ள நிதிநிலை அறிக்கை என்றாா்.

தமிழறிஞா் அரசு பரமேசுவரன்: தொல்லியல் துறையை மேம்படுத்தும் வகையிலும், நூல்கள் மொழி பெயா்ப்புக்கும் நிதிநிலை அறிக்கையில் கூடுதல் நிதி ஒதுக்கீடு செய்யப்பட்டது வரவேற்கத்தக்கது. அதுமட்டுமின்றி, மாநகராட்சிகளில் முதல்வா் படைப்பகம் என்ற அறிவிப்பு அரசின் புதிய முயற்சியாகும். தமிழறிஞா்கள், இளைஞா்கள், மாணவா்கள், பல்வேறு போட்டித் தோ்வுகளுக்கு தயாராவோருக்கு இந்த படைப்பகம் ஓா் வரப்பிரசாதம் என்றாா்.