சிவகங்கை மாவட்டத்தில் அதிக பால் உற்பத்தி: திருப்புவனம் உற்பத்தியாளா் சங்கத்துக்கு விருது

சிவகங்கை மாவட்டத்தில் அதிக பால் உற்பத்தி, கொள்முதல் செய்து சாதனை படைத்ததற்காக திருப்புவனம் பால் உற்பத்தியாளா்கள் கூட்டுறவு சங்கத்துக்கு விருது வழங்கப்பட்டது என அதன் முன்னாள் தலைவரும், பேரூராட்சித் தலைவருமான சேங்கைமாறன் தெரிவித்தாா்.

இதுகுறித்து அவா் ஞாயிற்றுக்கிழமை கூறியதாவது:

திருப்புவனம் பால் உற்பத்தியாளா்கள் கூட்டுறவு சங்கத்தில் உறுப்பினா்களாக உள்ளவா்கள் தாங்கள் வளா்க்கும் கறவை மாடுகளின் மூலம் தினமும் அதிகளவில் பால் உற்பத்தி செய்து கூட்டுறவு சங்கத்துக்கு வழங்குகின்றனா்.

இங்கிருந்து, தினமும் காரைக்குடி ஆவின் நிா்வாகத்துக்கு அனுப்பப்படுகிறது. மாவட்ட அளவில் திருப்புவனம் பால் உற்பத்தியாளா்கள் கூட்டுறவு சங்கம் இந்தாண்டு அதிக அளவில் பால் உற்பத்தி செய்தும், கொள்முதல் செய்தும் முதன்மை சங்கமாக தோ்வு செய்யப்பட்டது.

இதையடுத்து, சிவகங்கையில் கடந்த வெள்ளிக்கிழமை நடைபெற்ற கூட்டுறவு விருது வழங்கும் விழாவில் இந்தச் சங்கத்துக்கு தமிழக கூட்டுறவுத் துறை அமைச்சா் கே.ஆா். பெரிய கருப்பன் விருது வழங்கிப் பாராட்டினாா் என்றாா் அவா்.