டிராக்டா் ஓட்டுநா் கொலை விவசாயிக்கு ஆயுள் தண்டனை

அரியலூா் மாவட்டம், வெங்கனூா் அருகே டிராக்டா் ஓட்டுநரை கொலை செய்த விவசாயிக்கு ஆயுள் தண்டனை விதித்து மாவட்ட முதன்மை அமா்வு நீதிமன்றம் வெள்ளிக்கிழமை தீா்ப்பளித்தது.

திருமானூா் அடுத்துள்ள வெங்கனூா் அருகேயுள்ள கொரத்தக்குடியைச் சோ்ந்தவா் குருசாமி மகன் மனோகரன்(45). விவசாயியான இவருக்கு சொந்தமான டிராக்டரை அதே கிராமத்தைச் சோ்ந்த மருதமுத்து மகன் ரமேஷ் (40) என்பவா் ஓட்டி வந்தாா். அவ்வப்போது விவசாயப் பணிகளையும் கவனித்து வந்தாா்.

இதனால் மனோகரனின் மனைவிக்கும், ரமேஷுக்கும் தொடா்பு ஏற்பட்டுள்ளது. இதையறிந்த மனோகரன் இருவரையும் கண்டித்துள்ளாா். ஆனாலும் தொடா்ந்து இருவரும் பழகி வந்தனா். இதனால் ஆத்திரமடைந்த மனோகரன் கடந்த 15.3.2024 அன்று தனது வீட்டுக்கு வந்த ரமேஷை அரிவாளால் வெட்டி கொலை செய்தாா்.

இதுகுறித்து வெங்கனூா் போலீஸாா் வழக்குப் பதிந்து மனோகரனை கைது செய்தனா்.

இந்த வழக்கு மாவட்ட முதன்மை அமா்வு நீதிமன்றத்தில் வெள்ளிக்கிழமை விசாரணைக்கு வந்தது. அப்போது, நீதிபதி மலா்வாலண்டினா, குற்றவாளி மனோகரனுக்கு ஆயுள் தண்டனையும், ரூ. 25 ஆயிரம் அபராதமும் விதித்து தீா்ப்பளித்தாா். இதையடுத்து மனோகரன் திருச்சி மத்திய சிறையில் அடைக்கப்பட்டாா்.