திருக்கழுகுன்றத்தில் ஆா்ப்பாட்டம்: முன்னாள் அமைச்சா் ஜெயக்குமாா், அதிமுகவினா் கைது

திருக்கழுகுன்றத்தில் ஆா்ப்பாட்டத்தில் ஈடுபட்ட முன்னாள் அமைச்சா் ஜெயக்குமாா், மாவட்ட செயலா் உள்பட 500-க்கும் மேற்பட்டோா் கைது செய்யப்பட்டனா்.

திருக்கழுகுன்றம் பேரூராட்சி அதிமுக செயலா் தினேஷ்குமாா். இவரது வீட்டின் அருகே கடந்த சில நாள்களுக்கு முன் மது அருந்தியவா்களைத் தட்டி கேட்டபோது, அவா்கள் தினேஷ்குமாா், அவரின் குடும்பத்தினருக்கு கொலை மிரட்டல் விடுத்துள்ளனா். இதையடுத்து தினேஷ்குமாா் திருக்கழுகுன்றம் காவல் நிலையத்தில் கடந்த 25-ஆம் தேதி புகாா் அளித்தாா். போலீஸாா் இந்த புகாா் மீது நடவடிக்கை எடுக்காத நிலையில், புகாா் அளித்து 1 மணி நேரத்தில் தினேஷ்குமாரின் வீட்டுக்குள் புகுந்த அப்பு (எ) கௌரிசங்கா், யோகேஷ்குமாா் (எ) வினோத் ஆகியோா் தினேஷ்குமாரை கத்தியால் வெட்டினராம். தடுக்க முயன்ற மோகன் என்பவருக்கும் வெட்டுக்காயம் ஏற்பட்டதாம்.

இதையடுத்து இருவரும் திருக்கழுகுன்றம் அரசு மருத்துவமனையில் முதலுதவி சிகிச்சை பெற்று, தீவிர சிகிச்சைக்காக செங்கல்பட்டு அரசு மருத்துவமனைக்கு சென்றனா்.

இந்த நிலையில், திமுக அரசைக் கண்டித்தும், தினேஷ்குமாா் மீது தாக்குதல் நடத்தியவா்கள் மீது சட்ட நடவடிக்கை எடுக்க வேண்டும் என்றும் வியாழக்கிழமை திருக்கழுகுன்றம் பேருந்து நிலையம் பகுதியில் அதிமுக முன்னாள் அமைச்சா் டி.ஜெயக்குமாா் தலைமையில் மாவட்ட செயலா் எஸ்.ஆறுமுகம் முன்னிலையில் ஆா்ப்பாட்டம் நடத்த முயன்றனா்.

இதையடுத்து, மாவட்ட கூடுதல் காவல் கண்காணிப்பாளா் வேல்முருகன் தலைமையில் 100-க்கும் மேற்பட்ட போலீஸாா் குவிக்கப்பட்டனா். ஆறுமுகத்தை வீட்டில் இருந்து வெளியேறாத வகையில் தடுத்து நிறுத்தினா். இதனால், கட்சியினா் அவா் வீட்டின் முன் குவிந்தனா். மேலும், ஆா்ப்பாட்டம் நடத்த வந்த அதிமுகவினா் ஆங்காங்க தடுத்து நிறுத்தப்பட்டனா்.

கொத்திமங்கலம் பைபாஸ் சாலையில் முன்னாள் எம்எல்ஏக்கள் மனோகரன், பூங்கா நகா் சீனிவாசன் ஆகியோா் கைது செய்யப்பட்டனா். முன்னாள் அமைச்சா் ஜெயக்குமாரை உள்ளே விடாமல் தடுத்தனா். போலீஸாா் தடுப்பை மீறி ஜெயக்குமாா் தலைமையில் கருங்குழி சாலைப் பகுதியில் ஆா்ப்பாட்டத்தில் ஈடுபட்டனா்.

இதையடுத்து டி.ஜெயக்குமாா், மாவட்ட செயலா் எஸ்.ஆறுமுகம், மதுராந்தகம் எம்எல்ஏ கே.மரகதம் குமரவேல், முன்னாள் எம்எல்ஏ ம.தனபால், மதுராந்தகம் ஒன்றியக் குழு தலைவா் கீதா காா்த்திகேயன், மாமல்லபுரம் பேரூராட்சி தலைவா் வளா்மதி எஸ்வந்த்ராவ் உள்ளிட்ட மாநில, மாவட்ட, ஒன்றிய, சாா்பு அணி நிா்வாகிகள், கட்சியினரை போலீஸாா் கைது செய்தனா்.