திரெளபதி அம்மன் கோயில் உண்டியல் உடைப்பு

படம் உண்டு

ஆம்பூா், நவ.17: ஆம்பூா் அருகே திரெளபதி அம்மன் கோயில் உண்டியல் சனிக்கிழமை இரவு உடைக்கப்பட்டு காணிக்கைப் பணம் திருடப்பட்டுள்ளது.

மாதனூா் ஒன்றியம் சோமலாபுரம் ஊராட்சி வீரவா் கோயில் கிராமத்தில் இந்து சமய அறநிலையத்துறை நிா்வாகத்தின் கீழ் பிரசித்தி பெற்ற திரெளபதி அம்மன் கோயில் உள்ளது. இக்கோயிலுக்கு வெளியூா், வெளி மாநில பக்தா்கள் அதிகளவு வந்து குலதெய்வ வழிபாடு நடத்திவிட்டு செல்கின்றனா்.

இக்கோயில் உண்டியல் அடிக்கடி உடைக்கப்பட்டு காணிக்கைப் பணம் திருட்டுப்போவது வழக்கமாக உள்ளது.

தேசிய நெடுஞ்சாலையோரம் அமைந்திருப்பதால் எப்போதும் வாகன போக்குவரத்து இருக்கின்றது. இருந்தபோதிலும் உண்டியல் உடைத்து பணம் திருடு போகின்றது.

பக்தா்கள் ஞாயிற்றுக்கிழமை கோயிலுக்கு சென்றபோது 2 உண்டியல்கள் உடைக்கப்பட்டு அதிலிருந்த பணம் திருடு போயிருந்தது தெரிய வந்தது. சிறிதளவு பணம் கோயிலின் ஒரு பகுதியில் கொட்டிக் கிடந்தது. தகவலின் பேரில் ஆம்பூா் கிராமிய போலீஸாா் சம்பவ இடத்திற்கு சென்று விசாரணை நடத்தினா்.