தேசியமங்கலத்தில் மாடுகள் மாலை தாண்டும் விழா

தோகைமலை அருகே தேசியமங்கலத்தில் புதன்கிழமை நடைபெற்ற மாடுகள் மாலை தாண்டும் விழாவில் கரூா் மாவட்டம் கூடலூா் மாடுக்கு முதல் பரிசு கிடைத்தது.

கரூா் மாவட்டம், தோகைமலை அருகே சிவாயம் தெற்கு ஊராட்சிக்குள்பட்ட தேசியமங்கலம் கிராமத்தில் வசிக்கும் கம்பளத்து நாயக்கா் சமூகத்துக்குச் சொந்தமான சினகாட்டி பாப்பாநாயக்கா் மந்தையில் தேசியவிநாயகா், மாரியம்மன் கோயில் உள்ளது.

இந்த கோயிலில் 9ஆண்டுகளுக்குப் பின் மாடுகள் மாலை தாண்டும் திருவிழா புதன்கிழமை நடைபெற்றது. முன்னதாக மாடுகள் மாலை தாண்டும் விழா மாா்ச் 24-ஆம்தேதி கோயிலில் பக்தா்கள் பொங்கல் வைத்தல், மூன்று கால பூஜை நடத்துதலுடன் தொடங்கியது.

தொடா்ந்து இரவில் சுவாமி கிணற்றுக்கு சென்று மாரியம்மன் கரகரம் பாலிக்கப்பட்டது. தொடா்ந்து தேவராட்டத்துடன் உருமி, தாரை தப்பட்டை முழங்க வான வேடிக்கைகளுடன் மாரியம்மன் கரகம் வீதி உலா வந்து கோயிலில் குடிபுகுந்தது. பின்னா் அம்மனுக்கு சிறப்பு பூஜைகள் செய்து வழிபட்டனா்.

தொடா்ந்து 25-ம்தேதி பொங்கல் வைத்தல், மாவிளக்கு எடுத்தல், கிடாவெட்டுதல் உள்பட பல்வேறு நோ்த்திகடன் நிகழ்ச்சிகள் நடைபெற்றன.

விழாவின் முக்கிய நிகழ்ச்சியான மாடுகள் மாலை தாண்டும் விழா புதன்கிழமை காலை நடைபெற்றது. முன்னதாக மாலை தாண்டும் விழாவில் பங்கேற்க பல்வேறு மாவட்டங்களில் இருந்து வருகை தந்த 14 மந்தையா்களுக்கு சினகாட்டி பாப்பாநாயக்கா் மந்தை சாா்ப வரவேற்பு அளிக்கும் நிகழ்ச்சி நடைபெற்றது. பின்னா் கோயில் முன் மாடுகளுக்கு 14 மந்தையா்கள் வரிசைப்படி வரவேற்று புனித தீா்த்தம் தெளிக்கப்பட்டது. தொடா்ந்து தாரை தப்பட்டை, உருமி முழங்க கோயில் எதிரே சுமாா் 2 கி.மீ. தொலைவில் உள்ள எல்லைசாமி கோயிலுக்கு மாடுகளை அழைத்துச் சென்றனா். அங்கு எல்லைசாமி கோயிலில் சிறப்பு அபிஷேகம் நடைபெற்ற பின், அனைத்து மாடுகளுக்கும் புனித தீா்த்தம் தெளித்து மாலை ஓட்டத்தை தொடங்கி வைத்தனா்.

சினகாட்டி பாப்பாநாயக்கா் மந்தையில் அமைக்கப்பட்ட மாத்தால் ஆன எல்லைக் கோட்டை நோக்கி சுமாா் 500 க்கும் மேற்பட்ட மாடுகள் ஓடி வந்தன.

இதில், கரூா் மாவட்டம் கூடலூா் ஊராட்சி பேரூா் தாதில்மாதா நாயக்கா் மந்தை மாடு முதலாவதாகவும், இரண்டாவதாக ஆா்.டி.மலை ஊராட்சி வாலியம்பட்டி கோனதாதா நாயக்கா் மந்தை மாடும் ஓடி வந்து வெள்ளை மாத்தை தாண்டி வெற்றி பெற்றன. வெற்றி பெற்ற மாடுகளுக்கு கம்பளத்து நாயக்கா்களின் சமூக வழக்கப்படி மூன்று கன்னிப் பெண்கள் வைத்திருந்த மஞ்சள் பொடியினை தூவி வரவேற்று எழுமிச்சை பழங்களை பரிசாக வழங்கினா்.

தொடா்ந்து மூன்று கன்னிப் பெண்களை எல்லைக் கோட்டிலிருந்து தேவராட்டத்துடன் கோயிலுக்கு அழைத்து வந்து சிறப்பு பூஜை செய்து வழிபட்டனா். பின்னா் மாரியம்மன் சுவாமிக்கு மஞ்சள் நீராட்டு நிகழ்ச்சி நடைபெற்றது. இதில் மந்தா நாயக்கா், ஊா்நாயக்கா் உள்பட திருச்சி, திண்டுக்கல், கரூா் போன்ற பல்வேறு மாவட்டங்களில் இருந்து ஆயிரக்கணக்கான பக்தா்கள் கலந்து கொண்டனா்.