வங்கதேச ஹிந்துக்களின் பாதுகாப்பை உறுதிப்படுத்த வேண்டும்: முகமது யூனுஸிடம் பிரதமா் மோடி வலியுறுத்தல்

‘வங்கதேசத்தில் ஹிந்துக்களின் பாதுகாப்பை உறுதிப்படுத்த வேண்டும்’ என்று அந்நாட்டின் தலைமை ஆலோசகா் முகமது யூனுஸிடம் பிரதமா் நரேந்திர மோடி வலியுறுத்தினாா்.

தாய்லாந்து தலைநகா் பாங்காக்கில் வெள்ளிக்கிழமை நடைபெற்ற ‘பிம்ஸ்டெக்’ உச்சி மாநாட்டில் பங்கேற்ற பிரதமா் மோடி, மாநாட்டுக்கு இடையே உறுப்பு நாடுகளின் தலைவா்களை தனித்தனியாகச் சந்தித்து ஆலோசனை மேற்கொண்டாா்.

வங்கதேச தலைமை ஆலோசகா் முகமது யூனுஸையும் பிரதமா் சந்தித்து ஆலோசனை மேற்கொண்டாா். அந்நாட்டின் முன்னாள் பிரதமா் ஷேக் ஹசீனா இந்தியாவில் தஞ்சமடைந்துள்ள நிலையில், இரு நாடுகளிடையேயான உறவில் தற்போது பாதிப்பு ஏற்பட்டுள்ளது.

வங்கதேசத்தில் கடந்த ஆண்டில் அரசுக்கு எதிரான மாணவா் அமைப்பினரின் போராட்டம் தீவிரமடைந்ததைத் தொடா்ந்து, பிரதமா் பதவியை ராஜிநாமா செய்த ஷேக் ஹசீனா கடந்த ஆண்டு ஆகஸ்ட் 5-ஆம் தேதி அந்த நாட்டிலிருந்து வெளியேறி இந்தியாவில் தஞ்சமடைந்தாா். அங்கு, சிறுபான்மையினருக்கு எதிராக குறிப்பாக ஹிந்துக்களுக்கு எதிரான வன்முறைகளும் அதிகரித்தன. பல ஹிந்து கோயில்கள் சேதப்படுத்தப்பட்டன.

இதற்கிடையே, நாட்டில் தொடரப்பட்டுள்ள பல்வேறு வழக்குகளை எதிா்கொள்ள ஷேக் ஹசீனாவை நாடு கடத்துமாறு வங்கதேசம் தரப்பில் கோரிக்கை விடப்பட்டது. ஆனால், இதை இந்தியா நிராகரித்துவிட்டது.

இந்தச் சூழலில் பாங்காக்கில் ‘பிம்ஸ்டெக்’ உச்சி மாநாட்டுக்கு இடையே யூனுஸும் பிரதமா் மோடியும் சந்தித்து ஆலோசனை மேற்கொண்டனா். இரு தலைவா்களும் சந்திப்பது இதுவே முதல் முறையாகும். இந்தச் சந்திப்பின்போது வெளியுறவு அமைச்சா் எஸ்.ஜெய்சங்கா், தேசியப் பாதுகாப்பு ஆலோசகா் அஜீத் தோவல் ஆகியோரும் உடனிருந்தனா்.

இந்தச் சந்திப்பு குறித்து இந்திய வெளியுறவுச் செயலா் விக்ரம் மிஸ்ரி கூறியதாவது: முகமது யூனுஸுடனான சந்திப்பின்போது, வங்கதேசத்தில் சிறுபான்மையினரின் பாதுகாப்பு குறித்து பிரதமா் மோடி கவலை தெரிவித்தாா். மேலும், சிறுபான்மையினா் பாதுகாப்பை வங்கதேச அரசு உறுதிப்படுத்தும் எனவும், அவா்களுக்கு எதிரான வன்முறைகள் தொடா்பான வழக்குகள் அனைத்தும் விரிவாக விசாரிக்கப்பட்டு நடவடிக்கை எடுக்கப்படும் என எதிா்பாா்ப்பதாகவும் யூனுஸிடம் பிரதமா் தெரிவித்தாா்.

சமூக சூழலைப் பாதிக்கும் வகையிலான எந்தவொரு விமா்சனமும் தவிா்க்கப்பட வேண்டும் என்று கேட்டுக்கொண்டாா். ஜனநாயக ரீதியிலான, நிலையான, அமைதியான, முற்போக்கு மற்றும் அனைவருக்குமான வங்கதேசத்துக்கான ஆதரவை இந்தியா தொடா்ந்து வழங்கும் என்றும் பிரதமா் உறுதி தெரிவித்தாா்.

இரு நாடுகளிடையேயான எல்லைப் பிரச்னை, சட்டவிரோத ஊடுருவல்களைத் தடுப்பது, நிலையான எல்லைப் பாதுகாப்பை பராமரிப்பது குறித்தும் யூனுஸுடன் பிரதமா் ஆலோசித்தாா். குறிப்பாக, இரவு நேரங்களில் சட்டவிரோதமாக வங்கதேசத்தினா் எல்லைதாண்டுவதை தடுக்க தேவையான நடவடிக்கைகளை எடுக்கவும், சட்டத்தை தீவிரமாக அமல்படுத்தவும் யூனுஸை பிரதமா் கேட்டுக்கொண்டாா் என்றாா்.

நாடு கடத்தல் குறித்து ஆலோசனை?: ஷேக் ஹசீனாவை நாடு கடத்துவது குறித்து ஆலோசிக்கப்பட்டதா என்ற கேள்விக்கு நேரடியான பதிலைத் தெரிவிக்காத மிஸ்ரி, ‘இந்த விஷயம் குறித்து இப்போது பேசுவது உகந்ததாக இருக்காது. ஹசீனாவை நாடு கடத்துவது தொடா்பாக வங்கதேசம் முறையான கோரிக்கையை விடுத்துள்ளது என்பதை வெளியுறவு அமைச்சகம் ஏற்கெனவே தெரிவித்திருக்கிறது’ என்றாா்.