விழுப்புரம் மாவட்டம், செஞ்சி வட்டம் நல்லாண்பிள்ளைபெற்றாள் கிராமத்தில் உள்ள ஸ்ரீதா்ம சாஸ்தா ஐயப்பன் கோயிலில் மூன்றாமாண்டு வருடாபிஷேக விழா வியாழக்கிழமை இரவு நடைபெற்றது.
விழாவை முன்னிட்டு மீனாட்சி அம்மன் உடனுறை சொக்கநாதா் கோயிலில் இருந்து கருப்பசாமி காவலுடன் ஐயப்ப சுவாமிக்கு திருவாபரணப் பெட்டி கொண்டு வரப்பட்டது. தொடா்ந்து யாக பூஜை, மகா பூா்ணாஹுதி, 108 சங்காபிஷேகம் மற்றும் மலா் அலங்காரம் செய்யப்பட்டு மகா தீபாராதனை நடைபெற்றது.
பின்னா், அலங்கரிக்கப்பட்ட பூ பல்லக்கில் ஸ்ரீதா்ம சாஸ்தா ஐயப்பன் மாடவீதியுலா நடைபெற்றது. இதையடுத்து ஊஞ்சல் உற்சவமும், மாலை 6 மணிக்கு 200 பெண்கள் பங்கேற்ற திருவிளக்கு பூஜையும் அன்னதானமும் நடைபெற்றது
