நியாய விலைக் கடை விற்பனையாளா் பணியிடம் நோ்முகத் தோ்வுக்கு அனுமதி சீட்டு பதிவிறக்கம் செய்து கொள்ளலாம்

நியாயவிலைக் கடை விற்பனையாளா் பணியிடத்துக்கான நோ்முகத் தோ்வில் பங்கேற்க அனுமதி சீட்டு இணையத்தில் பதிவிறக்கம் செய்து கொள்ளலாம் எனத் தெரிவிக்கப்பட்டுள்ளது.

இதுகுறித்து தருமபுரி மாவட்ட கூட்டுறவு சங்கங்களின் இணைப் பதிவாளா் கு.த.சரவணன் வெளியிட்ட செய்திக் குறிப்பு:

கூட்டுறவுச் சங்கங்களின் பதிவாளா் கட்டுப்பாட்டில் தருமபுரி மாவட்டத்தில் செயல்பட்டு வரும் பல்வேறு வகையான கூட்டுறவுச் சங்கங்களில் காலியாகவுள்ள 58 விற்பனையாளா் பணியிடங்களை நேரடி நியமனம் மூலம் நிரப்புவதற்கு தகுதிபெற்ற விண்ணப்பதாரா்களிடம் இடமிருந்து விண்ணப்பங்கள் பெறப்பட்டு, பரிசீலிக்கப்பட்டதில் தகுதியான விண்ணப்பதாரா்களுக்கு விற்பனையாளா் பணியிடத்துக்கான நோ்முகத் தோ்வு நவ. 25 முதல் டிச. 5 வரை தருமபுரி, பாலக்கோடு சாலையில் உள்ள கமலம் இண்டா்நேஷனல் பள்ளி வளாகத்தில் நடைபெறவுள்ளது.

இந்த நோ்முகத் தோ்வுக்கான அனுமதிச் சீட்டை நவ. 18 முதல் தருமபுரி மாவட்ட ஆள் சோ்ப்பு நிலையத்தின் இணையதளம் வழியாக பதிவிறக்கம் செய்து கொள்ள வேண்டும் எனத் தெரிவிக்கப்படுகிறது என்றாா்.